Цагдаагийн байгууллагын шинэ хууль нөгөөдрөөс хэрэгжиж эхэлнэ. Энэ хуулийг Х.Тэмүүжин сайд дэвшилттэй, давуу тал ихтэй, шинэчилсэн, иргэдрүү чиглэсэн хууль хэмээн багагүй ярьж байсан. Гэвч хууль бүрийг нэгбүрчлэн танилцуулаагүй учир ард иргэдэд энэ талаарх мэдээлэл тун хомс байгаа юм. Тэгвэл хууль хэрэгжихэд хэдхэн хоног дутуу байгаа энэ өдрүүдэд цагдаагийн албаныхан өөрсдөө эл хуулиа дутагдалтай хэмээн шүүмжилж эхэллээ. Өөрөөр хэлбэл, Цагдаагийн албаны тухай хуулинд  бодит амьдралд үл нийцэх олон зүйл байгаа гэдгийг тэд хэлж байгаа юм.

Тухайлбал, ЦЕГ аймгаас алслагдсан суманд ажилладаг ажилчиддаа 60 сар тогтвор суурьшилтай ажиллавал 30 сарын цалинтай нь тэнцэх хэмжээний  урамшуулал олгох бодлого барьж ажилладаг гэнэ. Ингэснээр хэсэг, хороо, суманд үүрэг гүйцэтгэж буй цагдаа нар ажилдаа дуртай сэтгэл хангалуун ажиллах нөхцөлийг бүрдүүлэх боломжтой гэж тэд үзжээ. Өөрөөр хэлбэл, хөдөө сумдад хүчээр эсвэл дөнгөж төгссөн хүнийг албадан ажиллуулах бус өөрсдийн сонирхолоор туршлагатай, чадвартай хүмүүсийг ажиллуулахын тулд нэмэлт урамшууллыг бодолцсон байгаа нь энэ юм. Гэтэл шинэчлэгдсэн хуульд  энэ урамшууллыг олгохдоо ажилласан жилийг нь 2014 оны нэгдүгээр сараас эхлэн тоолж эхэлнэ гэж заажээ. Тэгэхээр шинэчилсэн эл төсөл нь олон жил суманд ажилласан цагдаа нарыг хохироож буй үзэгдэл юм.

Иймд энэ байдлыг цагдаагийн алба хаагчид ихэд  шүүмжилж байна.  Учир нь эрхзүйн байдлыг дээрдүүлсэн хуулийг буцааж хэрэглэдэг зарчимтай байтал худлаа хэлж алба хаагчдад горьдлого төрүүлж байна хэмээн тэд үзэж байгаа аж.

Цагдаагийн алба хаагчид шинэчилсэн хуулийн зарим заалт, төслийг буруутгаад зогсохгүй өндөр албан тушаалтнуудын увайгүй үйлдэл дээр ч дорвитой үг "чулуудаж" эхэллээ.
 
Тодруулбал, Цагдаагийн хөрөнгөлөг хурандаа нар гэсэн асуудал нэг хэсэг олны анхааралд байсан. Одоо ч энэ асуудал яригдсаар байдаг.  Тэгвэл манай алба хаагчид энэ асуудлыг үгүйсгэсэнгүй. "Цагдаагийн байгууллагад хүнээ оруулах, өөрсдийн төлөөлөлтэй байх сонирхол улстөрчдөд асар их байдаг.  Цагдааг улс төрийн, өөрсдийн явцуу сонирхолоор "утсан хүүхэлдэй" байлгах гээд чадахгүй байгаа хүмүүс байдгийг ард түмэн харж байгаа" гэх мэтээр цагдаагийн томоохон албан тушаалтнуудаас эхлээд энгийн цагдаа нарч ярьж байна .

Үнэхээр тэдний хэлдэгээр улстөрчид өөрсдийн гар хөл бологсодоо цагдаагийн албанд төдийгүй хуулийн салбарт шургуулах дур сонирхолтой байдаг. Учир нь тэдний хууль бус үйлдлийг хаацайлах, далдлан нуух нэгэн тэдэнд зайлшгүй хэрэгтэй шүү дээ. Тэгвэл улс төрчдийн энэ хувиа бодсон, албан тушаалаараа далдайлгасан байдлыг цагдаа нар ч эсэргүүцэж байгаагаа ард иргэдэд дуулгаж эхэллээ.