Замын цагдаагийн газрын дэд дарга, цагдаагийн хурандаа Ч.Жаргалсайханаас замын хөдөлгөөний нөхцөл байдал, гэмт хэргийн талаар асууж тодрууллаа.

-Зам тээврийн осол хэрэг өнгөрсөн онд хэр гарсан. Ер нь буурах хандлага байна уу?
-Ер нь зам тээврийн осол хэрэг 2013 онд нийтдээ 2143 бүртгэгдсэн байгаа. Өмнөх оны мөн үетэй харьцуулахад 7.2 хувиар нэмэгдсэн. Нийт зам тээврийн осол хэргээр 423 хүн амиа алдсан байгаа нь өмнөх онтой харьцуулахад 14.6 хувиар өссөн байна.  Мөн  1882 хүн гэмтсэн нь өмнөх оны мөн үетэй харьцуулахад 18.9 хувиар өссөн байгаа.

-Бүгд өмнөх оныхоос өссөн үзүүлэлттэй байна. Энэ нь юутай холбоотой юм бол?
-Нас баралтыг маш их анхаарах чухал байна. Тухайлбал, Улаанбаатарт нас барсан 117 хүн байгаагийн 102 нь явган зорчигч байгаа юм. Тэгэхээр замын хөдөлгөөний нөхцөл байдал болоод энэхүү 102 хүнийг аварч болох байсан бололцоотой эсэх талаар бид ярих ёстой. Ялангуяа замын хөдөлгөөнд оролцож байгаа явган зорчигдын аюулгүй байдал хэчнээн эрсдэлтэй байгаа дээр бид тодорхой ажил хийх шаардлагатай байгаа.

Орон нутагт онхолдох, согтуугаар тээврийн хэрэгсэл жолоодох, хурд хэтрүүлэх, мотоциклоор замын хөдөлгөөнд орсоноос болж нас барсан тохиолдлууд зонхилсон. Орон нутгийн хохирогчдын дийлэнх нь жолооч нар байгаа юм. Одоогоор 200 гаруй жолооч нас барсан.

Тэгэхээр иргэддээ анхааруулж хэлэхэд согтуугаар тээврийн хэрэгсэл бүү жолоодоочээ.

-Уг нь хөдөө орон нутгийн замыг засмал болгож, нийслэлтэй холбож байгаа шүү дээ. Энэ нь хөдөө орон нутгийн зам тээврийн осол буурахад нөлөөлөхгүй байна уу?

-Сүүлийн жилүүдэд нэлээд олон аймгуудын авто замыг холболоо. Энэ нь зам тавьж хөгжил авчирж байгаа боловч замын хөдөлгөөний аюулгүй байдалд эрсдлүүдийг дагуулж байна. Ялангуяа шинэ замууд тавьсан аймгуудаар гарсан зам тээврийн осол хэргүүд нэлээд хувиар өссөн байгаа юм. Хэчнээн сайхан зам тависан ч хурдаа хэтрүүлж, өөрийнхөө техникийн боломж, зогсоох аюулгүй байдлаа хангахгүй байгаа нь буруу юм. Мөн мотоциклоор замын хөдөлгөөнд оролцож, осол аваар гаргаж байна. Ялангуяа мотоциклоор хөдөлгөөнд оролцож байгаа иргэд мотоциклийн техникийн нөхцлийг сайн мэдэхгүй байгаагаас болж онхолдох нөхцөл байдлууд үүсч байгаа юм.

-Замын цагдаагийн газраас осол аваарыг бууруулах тал дээр ямар бодлого баримталж байна?

-Урьдчилан сэргийлэх чиглэлээр тодорхой ажил зохион байгуулна. Иргэд олон нийттэй хамтарсан ажлуудыг хийнэ. Нас баралт,  осол аваарыг бууруулах тал дээр бүх нийтээрээ анхаарах чухал юм.