Баянхонгор аймгийн иргэн Д.Намжилдорж өнөөдөр Ерөнхийлөгч У.Элбэгдорж, Ерөнхий сайд Н.Алтанхуяг, УИХ-ын дарга З.Энхболд болон Эрүүл мэндийн сайд Н.Удвал нарт хандаж хэвлэлийн хурал хийлээ.

Тэрбээр вакцины харшлаас болж амиа алдах дээрээ тулаад буй долоон настай охиныхоо төлөө ирсэн нь энэ аж. 

Түүний охин Н.Энхбилэг нь өнгөрсөн аравдугаар сарын 8-ны өдрийг хүртэл эрүүл саруул,  хичээл сургуульдаа явж байжээ. Харин 2013.10.08-нд Баянхонгор аймгийн эмч нар түүнд сахуугийн вакцин хийснээс болж охины гар, хэл гэх мэт эд эрхтэн нь хүрэнтэн хавдаж, үхжиж эхэлжээ. Бие нь улам муудаж бүр зарим хурууг нь тайрсан ч үлдсэн эд эрхтэн нь үхжиж, ямар ч эмчилгээ авахгүй болсон ба одоо охин үхэлтэй тэмцэн Эх нялхасын эмнэлэгт хэвтэн эмчлүүлж байна. Тиймээс охины аав сүүлийн аргаа хэрэглэж төрийн гурван өндөрлөг болон салбарын сайд Н.Удвал нарт хандаад байгаа нь энэ юм. Охины асуудлыг Эрүүл мэндийн яамнаас няцаасан бөгөөд хүүхэд вакцинаас болж өвдөөгүй, харин дэлхийд ховорт тооцогддог аюултай өвчнөөр өвчилсөн гэсэн тайлбарыг хийж байна.

Хэдийгээр Эрүүл мэндийн яамнаас ийм утгатай албан тоот гаргасан ч одоо охин “вакцины харшил” гэсэн албан ёсны оноштойгоор эмчилгээ хийлгэж байгаа юм. Тэгэхээр Эрүүл мэндийн яам, Эх нялхсын эмч нарын хэн нь худал онош тавьсан бэ гэдэг нь бас сонин юм.

Вакцинаас үүдэлтэй сөрөг үр дагавар өмнө нь хэд хэдэн удаа гарсан билээ. Тэгэхээр вакцин хийхээс өмнө хүүхдүүдийг нарийн шинжилгээнд хамруулж, үзлэг хийдэг болъё. Эсвэл вакцины чанартаа анхаарал хандуулах цаг нь болж гэдгийг охины аав Д.Намжилдорж хэллээ. 

Ингээд яг юу болсон талаар Н.Энхбилэг охины аав Д.Намжилдоржтой ярилцлаа.

-    Вакцин хийхдээ ариун цэврийн шаардлага хангаагүй байж магадгүй? Та бүхэн энэ талаар тодруулсан уу?

-    Вакцин хийх гэж буй талаар бидэнд урьдчилж мэдэгдээгүй. Мөн урьдчилгаа үзлэг хийгээгүй. Би албадан тарилга гэж үзэж байгаа. Ариун цэврийн шаардлага хангасан, хангаагүйг бид мэдэхгүй шүү дээ. Вакцинаас үүсэлтэй сөрөг асуудал үүсч болно. Гэхдээ вакцин хийх болсноо бидэнд урьдчилан мэдэгдэх ёстой. Эсвэл сөрөг нөлөө үзүүлсэн тохиолдолд яаралтай хандаарай гэсэн зөвлөмжийг өгч болох байсан.

-    Вакцин хийлгэсний дараа охины биед ямар өөрчлөлт орсон бэ?

-  Охин минь “Вакцин хийхэд гар маш их өвдсөн. Гар өвдөөд байна гэж хэлсэн ч сургуулийн эмч тоогоогүй” гэсээр гэртээ уйлсаар ирсэн. Гарыг нь үзтэл вакцин хийсэн хэсэгт улайж үрэвссэн байсан. Тэр шөнөдөө уйлаад унтаагүй. Өглөө нь “Хэл ам бадайраад дотор муухайраад байна” гээд унд цайгаа ч ууж чадахгүй байсан. Охин инь бие гайгүй болно гэж найдан харзнаад эмчид үзүүлэлгүй хоёр хоног алдсан. Үргэлжлээд амралтын өдрүүд таарсан тул дөрөв хоногийн дараа буюу даваа гарагт өрхийн эмнэлэгт очсон. Энэ хооронд вакцин хийлгэсэн гарынх нь булчин маш их хавдаж, хүрэндээд бэрсүү үүссэн байсан. Мөн хэл нь бамбайж, хүрэнтсэн байдалтай байсан.  Өрхийн эмч гарт нь натриар жин тавьж, эм өгөөд явуулсан. Тэгсэн ч нэмэр болоогүй. Гар нь улам хавдаж, хэл нь бүр их хүрэнтсэн. Өглөө эрт хүүхдийн эмнэлэгт очиход “Вакцин хариуцсан мэргэжилтэн Цэрэнхандтай уулз” гэсэн. Гэтэл Цэрэнханд нь “Вакцин найдвартай” гээд халгаагаагүй. Бүр үзлэг шинжилгээ ч хийгээгүй байж “Танай хүүхэд суурь өвчтэй, гарандаа үүтэй, жин багатай, сахуу татрантай...” гэх мэтчилэн ёс бус аашилсан.

-    Охин суурь харшлын өвчтэй байсан уу?

-    Үгүй. Ёстой  өвчин ярьдаггүй хүүхэд байсан.

-    Хотод ирэхээсээ өмнө аймагтаа эмчлүүлсэн юм байна. Тийм үү?

-    Охины бие бүр дордсоор байсан. Тэгээд хүүхдийн эмчид үзүүлэхэд мөн “Вакцинаас болсон” гэж хэлээд хэвтүүлж эмчлэхээр болсон. Эмнэлэгт хэвтэж байх хооронд Цэрэнханд гэх мэргэжилтэн өөрийгөө хамгаалахын тулд бидэнд хавчлага үзүүлж, “Манай вакцинаас ийм зүйл болох ёсгүй. Энэ хүүхдийг энд биш халдвартын эмнэлэгт хэвтүүлэхгүй юм уу. Танай хүүхэд л сахуу татрантай” гэх мэтээр дарамталж байсан. Энэ хооронд охины бие улам дордсоор байсан тул сургуулийнх нь эмч н.Дуламсүрэн, өрхийн эмнэлгийн сувилагч Даваа нарыг дуудаж хэн нь тариа хийснийг асуусан юм. Сувилагч Даваа вакцин хийсэн гэдгээ хэлсэн. Вакцин хийхээс өмнө хүүхдэд үзлэг хийсэн эсэхийг асуухад сургуулийнх нь эмч “Би үзэх шаардлага байхгүй. Өрхийн сувилагч өмнө нь үзлэг хийсэн байх. Надад хамаагүй” гээд бултсан. Ингээд хариуцах хүнгүй үлдсэн. Аймгийнхаа эмнэлэгт гурав хоног эмчлүүлсний дараа хотод ирж "Эх нялхасын эрүүл мэндийн үндэсний төв"-д “Вакцины маш хүнд хэлбэрийн харшил буюу урвал" гэсэн оноштойгоор өнөөдрийг хүртэл хэвтэж байна.

-    Одоо охины бие ямар байна вэ?

-    Охины минь бие улам муудсаар байна. Хоол идэж чадахгүй зовиурладаг. Хэл яриа нь муудаж, бэрхшээлтэй болсон. Өмнө нь зүгээр алхдаг байсан бол одоо чадахаа больж байна. Мөн баруун, зүүн хоёр гарынх нь эрхий хуруу хоёулаа үхжиж эхэлсэн тул тайруулсан. Мөн хэлнийх нь зарим үхэжсэн хэсгийг тайрсан. Одоо өдөр, шөнийн алинд нь ч унтаж чадахгүй зөвхөн өвчин намдаагч хэрэглэж, өдөр хоногийг аргацааж байна. Ийм ноцтой асуудал үүсч, нялх үр минь эрүүл мэндээрээ төдийгүй амь насаараа хохирох хэмжээнд хүрчихээд байхад Баянхонгор аймгийн эмнэлгийн вакцины мэргэжилтэн Цэрэнханд, IV сургуулийн эмч Дуламсүрэн, “Оточ Номгон” өрхийн эмнэлгийн сувилагч Даваа нар үл тоон хариуцлагаас зугтаж алга болсон. Үүгээр ч зогсохгүй тэд дээд шатны байгууллагуудаар өөрсдийгөө хамгаалуулж, гэм зэмгүй биднийг нь буруутгах мэдээлэл, тайлбар гаргуулаад амжсан байна билээ. ЭМЯ-аас саяд нэг удаа тохиолддог өвчин гэсэн. Саяд нэг удаа тохиолддог өвчин үү эсвэл сахуугийн вакцин буруу хийсэн эмчийн алдаа юу гэдгийг эмч нар хуралдаад шийддэг гэж үү?. Нарийвчилсан үзлэг, шинжилгээ хийж, шинжлэх ухааны үндэслэлтэй тайлбар хийх ёстой биш дээ. Өмнө нь олон шатны эмнэлгээс “Вакцины харшил” гэдэг нь тов тодорхой болчихсон зүйл яахаараа гэв гэнэт бараг дэлхийд байхгүй ховор өвчин болж хувирдаг билээ. Тэгээд бүр “Монголын анхны тохиолдол” гээд байгаа шүү.  Орон нутгаас нийслэлд ирж, олон cap эмнэлэгт охиноо сахиж буй ядарсан эцэг, эх бид хоёрт хариуцлага алдсан эмч нартай хэл ам, хэрүүл зарга хийж явах чадал, боломж үнэхээр алга. Эмч нар охиныг минь найдваргүй болж байна гэж хэлсэн. 

-    Эрүүл мэндийн яамныхантай энэ асуудлаар уулзаж үзсэн үү?

-    Надтай уулзаагүй. Н.Удвал сайд шинэ жилээс өмнө Эх нялхсын эмнэлэгээр ирээд эрчимт эмчилгээний тасаг руу орчихоод явсан. Тэгэхдээ манай хүүхэдтэй уулзана гэж байсан ч уулзаагүй. Яагаад ирсэнгүй вэ гэж эмнэлэгийн даргаас асуухад “Зав муутай болохоор уулзаж чадсангүй” гэж хэлсэн. Нэгдүгээр сард ирж уулзана гэсэн.