Шинэчлэлийн засгийн газрын ажлын хүрээнд Монгол Улсын Ерөнхий сайд Н.Алтанхуягийн санаачилгаар “Замын цагдаагийн торгуулийг бэлнээр төлдөггүй систем”  байгуулах ажлыг зохион байгуулж байгаа.  Ерөнхий сайдын багц 50 тэрбум  төгрөгөөс санхүүжилтийг нь гаргасан энэ ажлыг “Смарт солюшнс” компани гүйцэтгэсэн бөгөөд 1.8 тэрбум төгрөг зарцуулсан юм.

Өдгөө нийслэлийн 400  орчим цагдаад тус төхөөрөмжийг тараасан байгаа бөгөөд үүнд хөдөө орон нутгийн цагдаа нарыг хамруулаагүй юм.
 
Тэгвэл энэ төхөөрөмжийг нийлүүлж буй нийт мөнгө нь 1.8 тэрбум төгрөг гэдэг “хийсвэр” их мөнгө гэдгийг ард иргэд хэлэх болсон. Өөрөөр хэлбэл уг төхөөрөмжийг зах зээлийн үнээс хэтэрхий дээгүүр “шахсан” байгаа нь олон нийтийн дунд шүүмжлэл дагуулаад байгаа билээ.  Гэтэл  энэ асуудал намжаагүй, нэг тийш болоогүй байхад дахин иргэдийг бухимдуулсан зүйл гарч ирлээ. Тодруулбал, энэхүү төхөөрөмж нь өвлийн улиралд ашиглахад тохиромжгүй, -20 хэмээс дээш хүйтэнд ажилахгүй байх талтай гэдэг нь ажиглагдсан. Учир нь төхөөрөмжийг ашиглаж эхлэх үед -20 хэмд ажиллахгүй байсан гэдгийг замын цагдаа нар хэлж байна. Одоогоор төхөөрөмж -20 хэмд ажиллахгүй байх тохиолдол бага гарч байгаа ч цаашдаа ажиллахгүй байх тохиолдол гарч магадгүй гэдгийг ч тэд хэлсэн юм.

Тэгвэл төхөөрөмж ганц хүйтэнд ажиллахгүй байгаад зогсохгүй өдгөө программын янз бүрийн асуудлыг дагуулж эхэлсэн байна. Энэ талаар Замын цагдаагийн газрын дэд дарга Ч.Жаргалсайханаас тодруулахад, "Одоохондоо цаг агаар дулаахан байгаа учир хүйтнээс болж төхөөрөмж ажиллахагүй байх тохиолдол хараахан гараагүй байна. Ойрын үед цаг агаар сайхан байна. Харин төхөөрөмж программын тал дээр алдаа заах тохиолдол байгаа. Тухайлбал, цагдаа тодорхой байршилд байж байгаад байршлаа өөрчлөхөөр өмнөх байршлыг нэлээн удаж байж тогтоож байгаа. Өөрөөр хэлбэл нэлээн цаг хугацаа авч байж байршилыг нь тогтоож, удаан болхидуу ажлаад байна. Программ хангамж дээр саатал, гомдол ер нь бий. Би хурдыг нь сайжруулах, байршил хурдан тогтоох тал дээр нь анхаарч байгаа" гэв.

Ийн өндөр үнээр нийлүүлсэн уг төхөөрөмж программын тал дээр хүртэл асуудал үүсгэж байгаа нь замын цагдаагийн ажилд болоод иргэдэд чирэгдэл учруулж байна.

Төхөөрөмжийн гар компьютер нэг бүрийг 3.5 сая, мобайл хэвлэгчийг 1.5 сая төгрөгөөр БНСУ-аас худалдан авсан байдаг. Мөн программыг суулгахад 50 сая гээд "Ухаалаг систем"-ийн төслийн нийт өртөг 1.8 тэрбум төгрөг болж байгаа. Тэгвэл эдгээр төхөөрөмжийг БНСУ-д маш хямдаар борлуулдаг байгаа юм. Тодруулбал, манайхны 3.5 саяар нэг бүрийг нь авсан гар компьютер 950 000 вон, 1.5 саяын үнэтэй мобайл хэтэвч 299 000 воны үнэтэй байх жишээтэй. Монгол банкны өчигдрийн ханшаар нэг вон 1.63 төгрөгтэй тэнцэж байгаа. Тэгэхээр ямархуу зөрүү гарч байгааг хэнбугай нь ч бодоод олчих биз ээ.
Юутай ч нэг бүрийн үнэ нь бараг 5 саяаар тооцогдох төхөөрөмж ийм байгаад иргэд маш ихээр шүүмжилж байна. Одоо бүр 50 саяаар суулгасан программын тал дээр асуудал үүсгэж байгаа юм чин цаашдаа удаан хэрэглэгдэнэ гэдэг юу л бол.