Хүн амын хөгжил, нийгмийн хамгааллын яамнаас 2014 оны "Гэр бүлийн хөгжлийг дэмжих" жил болгон зарлаж байна. Энэ талаар өнөөдөр Хүн амын хөгжил нийгмийн хамгааллын сайд С.Эрдэнэ мэдээлэл хийв. 2014 он бол хүн амын өсөлтийн нэн таатай үе юм. Өнгөрсөн онд л гэхэд Монголын хүн ам 80 мянгаар нэмэгдсэн. Тиймээс хүн амын өсөлт нэн сайн байгаа энэ үед гэр бүлийг дэмжиж ажиллах нь чухал гэдгийг С.Эрдэнэ сайд онцоллоо.

Тодруулбал 2014 оны босгон дээр Монгол Улсын хүн амын тоо 2 сая 292 мянга 164 болсон. Эдгээрийн 10 орчим хувийг ахмад настанууд, 27,7 хувийг 0-14 насныхан, 37,5 хувийг 15-34 насныхан, өсвөр үе, залуучууд, 51 хувийг эмэгтэйчүүд, 49 хувийг эрчүүд эзэлж байна гэсэн статистик тоо байгаа бөгөөд улсын хэмжээнд 768,263 өрх, гэр бүл байгаа аж.  “Гэр бүл нь  үндэсний тусгаар тогтнол, аюулгүй байдлын үндэс, улс орны хөгжил дэвшлийн баталгаа төдийгүй төр улс дотор оршин буй гэр улс нь үндэсний ёс заншил, соёл уламжлал, овог удсын үнэт зүйл өвлөгдөн хадгалагддаг хүний хөгжил төлөвшлийн суурь орчин байдаг. Улс орон хөгжих гол үндэс нь хүн амын тоо байдаг” тэрбээр хэлэв.

Засгийн газраас 2003 оны гэр бүлийн хөгжлийг дэмжих жил болгон зарлаж байсан ч өдийг хүртэл уг тогтоолын дагуу төлөвлөсөн ажлын гүйцэтгэлийг үнэлж дүгнээгүй, ямар ч үр дүн гарсныг тайлагнах нээлттэй мэдээлэл олдоогүй байгаа гэдгийг албаныхан хэлж байна. 2014 онд Гэр бүлийн тогтвортой байдлыг дэмжих үндэсний хөтөлбөр, “Миний гэр бүл” хүүхэд хөгжлийн хөтөлбөр боловруулан хэрэгжүүлэх, гэр бүл зөвлөгөө өгөх төвийг байгуулж, олон улсын жишигт нийцүүлэх, Гэр бүлийн тухай хуулийн шинэчилсэн найруулгын төслийг УИХ-аар батлуулж, хэрэгжүүлэх зэрэг ажлуудыг хийх юм байна.

ХАХНХЯ-аас 2014 онд гэр бүлийг дэмжиж доорх ажлуудыг хийхээр төлөвлөжээ.

- Биеийн тамирын заал барих
-  Хөгжлийн бэрхшээлтэй хүмүүст зориулсан сэргээн засах эмчилгээний төвийг ашиглалтад оруулах
-  Хүүхэд хамгаалал хөгжлийн төвийг ажиллуулах
- Нэг аймагт дунджаар 5-10 сургуул цэцэрлэг босгох