Монголын нэгэн сайд ингэж хэлжээ. Гурван сая дахь иргэн 2015 оны 4-6 дугаар сард мэндэлнэ гэсэн сайхан мэдээтэй хамт “Төрөх эмнэлэг шинээр баригдтал жирэмсэн болохгүй байхгүй юу даа!” гэж нэгэн төрийн сайд хэлсэн нь цахим ертөнцөд шуугиан дэгдээгээд байна. Өнгөрсөн жил улсад нийт 76,2 мянган хүүхэд шинээр төрж, Монголын хүн ам 2 сая 929 мянга боллоо. Гэтэл нөгөө л жил бүр өвөл, зунгүй яригддаг төрөх эмнэлгийн хүрэлцээ асуудал дагуулсаар байдаг. 2014 онд өнгөрсөн жилээс ч олон хүүхэд төрөх тооцоо, таамаг гараад байдаг. Тиймээс төрөх эмнэлгээ яах вэ? гэсэн асуултад нэгэн сайд ингэж хариулсан байх юм. “Төрөх эмнэлэг нэмэгдтэл хүүхэдтэй болохгүй, хүлээж бай” гэж хүн хэзээ үр, хүүхэдтэй болохыг хорьж цагдсан утгатай энэ үгийг хэн хэлэв? Хэрэв нэр нь ил болбол олон эцэг, эхчүүд түүнийг хариуцлагагүй үгийнх нь төлөө огцруулахыг шаардах нь лавтай. Өмнө нь манай Шинэчлэлийн Засгийн газрын сайд нар иргэддээ иймэрхүү “тэгвэл болихгүй юу” гэсэн өнгө аястай үг хэлж байсан удаатай. Ерөнхий сайд Н.Алтанхуяг “Будаа үнэтэй байгаа бол гурилаа идэхгүй юу” гэж хэлээд олон нийтийг бухимдуулаад авсан. Будааны үнийг бууруулахыг оролдохын оронд “идэхээ л больчих” гэж тоомжиргүй хандсан Ерөнхий сайдын энэ үг өнгөрсөн жилийн супер онигооны нэг болоод авлаа. Иргэд яахав, бэнчиндээ тааруулаад гурил, будаагаа аваад идэж байна. Харин хүүхэд төрөх бол шал ондоо асуудал!

   Монголын хүн ам өснө гэдэг хөгжлийн бас нэг үзүүлэлт. Гэр бүлүүд Засгийн газрын бодлогын дагуу хүүхэд гаргахгүй төрөх эмнэлэг нэмэгдэхийг хүлээгээд сууж байна гэж юу байхав.
  Уг нь Улаанбаатарт шинэ төрөх эмнэлэг барихаар бараг дөрвөн жилийн өмнө буюу 2010 оны 12-р сард Хан-Уул дүүрэгт сүр дуулиантайгаар тууз хайчилж байсан. 19 тэрбум төгрөгийн өртөгтэй, 300 ортой. Гэтэл цахилгаан, дулааныг шийдээгүй гэх зэрэг тендерийн хариуцлагагүй байдлаас өдийг хүртэл таг чиг. Хотын эхчүүд төрөх эмнэлэгт ганц хоноод л гарч байна. Мөн хугацаа нь дөхсөн эхчүүдийг яг төрөх үедээ ир гээд олон дахин буцаасаар. Манай сайд нар хэчнээн "Төрөх эмнэлэг шинээр баригдтал жирэмсэн болохгүй байхгүй юу даа!” гэж үүрэгдээд нэмэргүй нь мэдээж, Монголын үрс маш олон болсоор байна. Харин ингэж хариуцлагагүй мэдэгдэл хийсэн сайд өөрөө онигоонд ороод дуусах нь мэдээж.

   Үндэсний статистикийн хорооноос тооцоолж байгаагаар /хааяа дундаж цалин 900 мянгад хүрсэн гэж нэлээд хадуурсан мэдээлэл хийдэг/ 2014 онд ч Монголын гурван сая дахь иргэн мэндлэх магадлалтай аж. Учир нь 2012 оны сүүлийн байдлаар манай улсад 1,4 сая эмэгтэйчүүд байгаагаас 57,64 хувь буюу талаас илүү нь төрөх насныхан байна. Мөн 2014 онд хүн амын цэвэр өсөлт 71 мянга хүрэх магадлалтай гэсэн тооцоо гаргажээ. Тэгвэл энэ жилдээ л монголчууд гурван саяулаа болох аж. Гурван сая дахь иргэндээ орон сууц бэлдээд л байдаг, бусад үрсээ яах болж байна, сайд нар аа!