Шоронгуудыг нэгтгэх асуудал яригдаад, Ургах наран хорооллын хавьцаа томоохон хорих анги барьж байгаа. Тэгвэл энэ ажлын талаар ХЗЯ-ны Бодлогын хэрэгжилтийг зохицуулах газрын Хууль сахиулах бодлогын хэлтсийн дарга Г.Оюунболдоос тодрууллаа.-Манай улс бүх шоронгуудаа төвлөрсөн нэг газар байршуулах журам гаргах тухай өмнө нь яригдаж байсан. Энэ асуудал аль шатандаа явж байна?
-Хотыг тойрсон яг 11 хорих анги байдаг. Хөдөө орон нутгийн хорих ангиудтай нийлээд 24 бий. Нэг хорих анги нь 100-гаад хүнтэй байдаг. Тэгэхээр эдгээр хорихуудаа нэгтгээд дөрвөн том хорих ангитай болгох гэж байгаа. Эхний ээлжинд 1000-1500 хүнтэй Ургах наран хорооллын ойролцоох хорихыг ашиглалтанд оруулхаар ажиллаж байна.
-Чухам ямар зорилгоор хорих ангиудыг нэгтгэхээр болсон бэ?
-Хамгийн гол нь энэ олон хорих ангид зарцуулж байгаа мөнгийг хоёр дахин багасгах зорилготой. Яваандаа хоригдлуудыг бүгдийг ялгаварлалгүйгээр хөдөлмөр эрхлүүлж хохирлыг бүрэн төлүүлдэг болгоно. Адаглаад 461 цагдан хорихоос нэг хориход хүн хүргэж өгөхөд бинзений мөнгө багагүй гарна. Цаашлаад хоригдлуудын хоолны гурил, будаа, тог, цахилгаан зэрэг нь төсөвт ихээр тусдаг байна.
Энэ мөнгө татвар төлөгчдийн халааснаас гарч байгаа. Үүнийг үр ашигтай зарцуулахын тулд төвлөрсөн дөрвөн хорих барихаар төлөвлөж байгаа аж.
-Ер нь нэг хориход жилд улсын төсвөөс хэчнээн төгрөг төсөвлөдөг бэ?
-Нэг хоригдолд жилдээ 1 сая 200 мянган төгрөг зарцуулдаг.
-Дөрвөн хорих ангийг яг хаана, хаана барихаар төлөвлөж байгаа вэ?
- Ургах наран хорооллын ойролцоох хорих ангийг энэ ондоо багтааж ашиглалтанд оруулахаар төлөвлөсөн байгаа. Харин үлдсэн гурван хорих ангийг Баруун, Зүүн, Хойд бүсэд барина.
-Барилгын ажил одоо хэдэн хувьтай явж байна?
-Барилгын ажлын хувийг би хэлж мэдэхгүй. Одоогоор санхүүжилт байхгүй зогссон байгаа.
-Шинэ хорих анги сүүлийн үеийн стандартын дагуу, маш сайн зохион байгуулалттай баригдана биз дээ?
-Ер нь одоогийн хорих анги тус бүр камерийн хүрэлцээ муу байдгаас хоригдол их алдагддаг. Харин бүгдийг нь нэг дор байрлуулвал хоригдол оргох байдал давтагдахгүй. Өөрөөр хэлбэл одоо баригдаж байгаа хорих ангийг чанарын хамгийн сайн стандартад, олон давуу талтайгаар барьж байгаа. Мөн шинэ хориход дэд бүтцийг маш сайн хөгжүүлж бүх хоригдлуудыг хөдөлмөр эрхлүүлдэг болгоно. Ингэснээр яллагдагчид хохирлоо бүрэн төлөх боломжтой.
-Тэгвэл хуучин хорих ангиудын байрыг хэрхэх вэ?
-Хуучин хорих байруудыг үр ашигтай зүйлд зарцуулж, зарж, заримыг нь хувьчилж өөр дэд бүтцэд ашиглах боломжтой.
-Нийслэлийн төвлөрсөн хориход Хүүхдийн хорих ч багтах уу?
- Хүүхдийн, дамжин хорихийг төвлөрсөн хориход шилжүүлэхгүй. Учир нь “хүүхдийн хорих” сургалт хүмүүжлийн тусгай байр нэршилтэй болж тусдаа өөр газар байлгана. Харин эмэгтэйчүүдийн хорихыг нэгдсэн хориход байршуулах ч бүх хорих тусдаа байх юм.
-Чанга дэглэмтэй хорихуудыг нэгтгэлд хамруулах уу?
-Хүүхдийн хорихоос бусдыг нь нэгтгэнэ. Нийслэлд одоогоор гурван чанга дэглэмтэй хорих бий.
-Манай улсад өдгөө хэчнээн хоригдол ял эдэлдэг вэ?
-Монгол Улсад одоогоор 8000 гаруй хүн ял эдэлж байгаа бол энэ оноос эхэлж хоригдлын тоог багасгах, хорих ялыг цөөн оноох бодлогыг барьж ажиллаж байгаа. Тиймээс ялын бодлогыг уян хатан болгож 8000 хоригдлыг 4000 болгож цөөлөхөөр яригдаж байна.
Д.Ундрах /24tsag.mn/
Сэтгэгдэл (4)