Монгол Улсын Дээд шүүхийн Иргэний хэргийн танхим өнгөрсөн онд 759 хэргийг  хяналтын шатны шүүх хуралдаанаар хэлэлцсэн байгаа юм. Тэгвэл үүнээс  124 нь  хөдөлмөрийн эрх зүйн маргаан  байгааг онцлох нь зүйтэй болов уу.

Тодруулбал, Дээд шүүх ажлаасаа үндэслэлгүй халагдсан иргэдийн нэхэмжлэлтэй шүүх хурлыг ихээр шийдвэрлэсэн байна. Энэ нь манай улсад ажлаасаа үндэслэлгүйгээр халагдах, янз бүрийн аргаар гүтгүүлж ажлын байраа орхих явдал ихээр гардагыг харуулж буй биз ээ.

Гагцхүү өмнө нь ажлаасаа халагдсан хүмүүс тэгсхийгээд чимээгүйхэн өнгөрч, дараагийн ажлаа хайдаг байсан бол өдгөө удирдлагынхаа шударга бус байдалтай зөрчилдөж, түүний эсрэг гомдол гаргадаг болжээ.  Удирдлага, дарга, захирал гэхээр л дуртай хүнээ ажлаас халж, сольж болдог байсан бол эрх нь зөрчигдсөн ажилчид шүүхэд хандсанаар энэ байдал арай багасах тийшээ хандсан гэхэд болох юм.

Дээрх 124 хэргийг Дээд шүүх авч хэлэлцээд  72.5 хувь буюу 90 нэхэмжлэлийг  үндэслэлтэй гэж үзэж,  ажилтныг хуучин эрхэлж байсан ажил, албан тушаалд нь эгүүлэн тогтоох, ажилгүй байсан хугацааны цалин хөлстэй тэнцэх хэмжээний нөхөн олговрыг ажил олгогчоос гаргуулан ажилтанд олгохоор шийдвэрлэсэн байгаа юм.

Шүүх гэхээр л мөнгөтэй хүнд үйлчилдэг гэх үзэл иргэдийн дунд нэвт шингэсэн гэхэд болно. Гэхдээ энэ мэт байгууллагын удирдлагуудын эсрэг иргэдийн талд шийдвэр, тогтоол гарч байгаа нь иргэдийг шүүхийн байгууллагад итгэх итгэлийг нэмэгдүүлж байгаа юм. Тиймээс ч сүүлийн үед ажлаасаа үндэслэлгүй халагдсан иргэд шүүхийн байгууллагад хандах нь ихэсчээ.

Тэгвэл эдгээр  90 хэрэгт судалгаа хийхэд  39 нь төрийн өмчит  байгууллагатай хамааралтай харин  51 нь хувийн аж ахуйн нэгжийн албан тушаалтанд холбоотой байгааг албаныхан хэлж байна.

Бүр тодруулж хэлбэл, эдгээр 39 газрын  9 нь Засаг даргын тамгын газар, 11 нь сургууль цэцэрлэг, 6  нь эмнэлэг зэрэгт холбогдуулан гаргасан нэхэмжлэл   байгаа юм. Тэгэхээр Засаг даргын тамгын газар, сургууль, цэцэрлэгт хууль бус халаа сэлгээ их байдгийг Дээд шүүхээс гаргасан судалгаанаас ийн харж болох нь ээ.

Дээд шүүх ажилчдыг эргүүлэн ажилд нь оруулахаас гадна  нийт 563 012 444 төгрөгийг ажил олгогчоос гаргуулж, 550 023 589 төгрөгийг ажилтанд, 15 338 855 төгрөгийг улсын тэмдэгтийн хураамжид оруулахаар шийдвэрлэсэн байгаа юм.

Ийн шүүхийн байгууллагыг мөнгөтэй хүмүүст үйлчилдэг гэсэн иргэдийн бодол бага багаар өөрчлөгдсөөр байгааг хэлэх нь зүйтэй биз ээ.

Төрийн байгууллагынхны хууль бус халаа сэлгээ, ажлын  байрнаасаа шалтгаангүйгээр хөөгдөх зэрэг асуудлаар цуврал материал хүргэх болно.