Дундговь аймаг 2014 оныг “Иргэний хөгжлийг дэмжих жил” болгон зарлажээ. Нутгийн иргэдийн зүгээс “Дундговь аймгийн иргэний хөгжлийн бодлого”-ыг гаргах саналыг аймгийн удирдлагууддаа тавьсан байна. Энэ дагуу тус аймаг “Хувь хүний хөгжлийн институт”-ын хөтөлбөртэй болж, хувь хүнд чиглэсэн бодлого, хувь хүний хөгжлийн шаталсан сургалтуудыг орон нутагтаа зохион байгуулахаар боллоо. Тиймээс хувь хүний хөгжлийн хөтөлбөртэй болж, Хувь хүний хөгжлийн институттэй цаашид энэ чиглэлд хамтран ажиллахаар болсон байна. Үүнийгээ баталгаажуулж, өнөөдөр санамж бичиг байгууллаа. Санамж бичиг  байгуулах ажиллагаанд Дундговь аймгийн Иргэдийн хурлын дарга С.Буджав, Хувь хүний хөгжлийн институтыг үүсгэн байгуулагч, Хүний эрхийн хуульч М.Ичинноров нар оролцлоо.


Дундговь аймаг нь “Хувь хүний институд”-ын хөтөлбөртэй болсноор иргэдээ гурван чиглэлээр хөгжүүлэх боломж нээгдэж байгаа юм байна.

Үүнд:
1.    Иргэдийг мэдлэгжүүлэх. Сэтгэлгээг нь өөрчлөх.
2.    Иргэдээ орлоготой болгох санаачилгыг эхлүүлж, арга замыг зааж өгөх.
3.    Иргэдээ соёлжуулах.

С.Буджав: Хувь хүний хөгжлийн хөтөлбөрийг хэрэгжүүлснээр асар их өөрчлөлт орох юм

Энэ талаар Дундговь аймгийн ИТХ-ын дарга С.Буджав “Төр, захиргааны ажилчид жилдээ 1-3 удаа сургалтад хамрагддаг. Харин иргэд тэр бүр хүссэн сургалтад суугаад байж чаддаггүй. Хүүхдэдээ хичээл заахаас эхлээд эцэг, эхэд үргэлж боловсрол дутагддаг. Тиймээс бид иргэнээ хөгжүүлэхийн тулд системтэй, тасралтгүй сургалтуудыг явуулахаар энэ ажлыг эхлүүлж байна. Ингэснээр иргэн хүний сэтгэлгээ, мэдлэг, оюун ухаанд асар их өөрчлөлтүүд орох юм. Хэрвээ хувь хүн хөгжиж чадвал сайхан амьдарна. Мөн байгууллагыг сайн удирдана, орон нутгаа ч хөгжүүлэхэд гар бие оролцох юм. Нийгэмд гэмт хэрэг их гарах болсон нь иргэдийн боловсрол, мэдлэг дутуу, дулимаг байгаатай холбоотой. Тэгэхээр бид иргэдээ хөгжүүлбэл энэ мэт олон зүйлээс сэрэмжилж чадах юм” гэлээ.

М.Ичинноров: Хувь хүн хөгжвөл улс орон хөгжинө

Харин М.Ичиноров “Хувь хүний хөгжлөөс нийгмийн болоод хувь хүний хөгжил хамаарна. Мөн хувь хүний хөгжлөөс бат бөх гэр бүл хамаарна. Тиймээс нийгмийн хөгжлийн гол түлхүүр нь хувь хүний хөгжил юм. Орон нутгийн хөгжлийн түлхүүр ч хувь хүний гарт байна. Тиймээс энэ философид үндэслэн бид “Хувь хүний хөгжлийн институт”-ыг байгуулсан юм. Энэ ажлынхаа хүрээнд Ерөнхий сайд Н.Алтанхуягийн ивээл дор “Амьдрах ухаан-Амжилтын хөтөч” хөтөлбөрийг хэрэгжүүлээд нэг жил болж байна. Өнгөрсөн хугацаанд бид “Амьдрах ухаан-Амжилтын хөтөч” сургалтыг танхимаар 1000 гаруй хүнд хүргэж,  10 000 оюутанд лекц уншлаа. Мөн 100 гаруй байгууллагад хувь хүний хөгжлийн, байгууллагын хөгжлийн хөтөлбөрийг хүргэсэн. Аймгийн засаг дарга нар болон аймаг, сум, нийслэл дүүргийн тамгын газрын дарга нарт “Энгийнээр удирдахуй” удирдлагын сургалтаа мөн хүргэсэн бөгөөд орон нутгийн хувь хүний хөгжлийн цогц бодлого хэрэгжүүлж эхэлж буй юм.  Мөн эмэгтэй, эрэгтэй хүмүүс болон гэр бүлийн гишүүд, өсвөр үеийнхэнд зориулсан сургалтууд манай байгууллага дээр явагдаж эхэллээ. Мөн манайхаас гаргаж байгаа “Амжилтын хөтөч” хуанлитай ном маань хувь хүний хөгжлийн чиглэлийн шилдэг бүтээлийн гран при шагнал авсан. Энэ мэт бидэнд хийж буй олон ажил байна. Харин орон нутгийн хөгжлийн хөтөлбөрийг хэрэгжүүлэх санаачилгыг анх Дундговь аймаг дэмжлээ. Аймгийнхаа хувь хүмүүсийг хөгжүүлэхэд ингэж идэвхтэй ажиллаж байгаад тус аймгийн удирдлагуудад баяр хүргэе. Одоо Дундговь аймагт хувь хөгжлийн талаар томоохон хэлэлцүүлэг, бодлого боловсруулах ажиллагаа явагдана. Тус аймаг т шаталсан сургалтуудыг манай байгууллагаас явуулах юм.   Ер нь хөгжсөн, төлөвшсөн хувь хүн бол шинэчлэлд оролцдог. Хөгжөөгүй хүмүүс ямар нэгэн зүйлд шүүмжлэх байр сууринаас ханддаг. Тэгэхээр Дундговь аймагт “Хувь хүний хөгжлийн хөтөлбөр” хэрэгжсэнээр олон  сайн үр дүн гарна гэдэгт бид найдаж байгаа” хэмээн ярив.