Удаа дараа зөрчил гаргаж байсан 124 жолоочийн жагсаалтыг гарган эхний ээлжинд эрх хасахаар болжээ. Энэ талаар Замын цагдаагийн газрын урьдчилан сэргийлэх хэлтсийн байцаагч, цагдаагийн ахлах дэслэгч Э.Энхболдоос тодрууллаа.

-Яг ямар зөрчил гаргасан иргэдийн жолоодох эрхийг хасч байгаа вэ?
 
-Замын хөдөлгөөний удирдлагын төвөөс удаа дараа зөрчил гаргаж байгаа, бэлэн бус торгуулийн  хуудсыг хүлээж аваад торгуулийн төлбөр төлөөгүй 124 жолоочийн улсын дугаар, эзэмшигчийн мэдээллийн Замын цагдаагийн удирдлагын төвөөс гаргаж өгсөн байгаа. Энэ мэдээллийн дагуу бид эдгээр зөрчил гаргасан жолооч нарт захиргааны арга хэмжээг чангатгаж тооцох арга хэмжээг авч эхэлсэн. Тухайлбал, өчигдөр замын хөдөлгөөний дүрмийг 22 удаа хурд хэтрүүлж зөрчсөн "0546 УНЭ" дугаартай "Тоёото прусс" машины жолоочийг дуудаж, жолоодох эрхийг нь хоёр жилийн хугацаагаар хассан. Энэ жолоочийн гаргасан зөрчил бидэнд ирсэн мэдээллээр болон нотлох баримт, хяналтын камераар нотлогдсон. Өөрөөр хэлбэл, хэзээ, хаана ямар зөрчил хэнчээн удаад гаргасан зэрэг нь илэрсэн.

-Тэгэхээр торгуулийн төлбөрөө төлж байгаа боловч удаа дараа зөрчил гаргасан жолооч нарын эрхийг хасч байгаа гэж ойлгож болох уу?

-Хэдийгээр торгуулийн төлбөрөө төлсөн ч олон удаа зөрчил гаргавал Замын цагдаагийн газраас замын хөдөлгөөнд оролцуулахгүй байх тал дээр хуулийн дагуу арга хэмжээ авч ажиллана.