Замын-Үүд-Эрээн чиглэлийн галт тэрэгний тасалбарыг “ховрын бараа” болгодог цаг үе буюу цагаан сарын өмнөх өдрүүд үргэлжилж байна.

Энэ үед урд хөршийг зорих галт тэрэгний тасалбарын эрэлд мордсон хэн бүхний өмнө гурван сонголт бий болдог. Эхнийх нь хамгийн хохирол багатай буюу захиалах юм. Гэхдээ ачаалал хэт ихтэй байгаа энэ үед хүссэн өдрийн чинь тасалбар тийм амар олдохгүй л болов уу.

Хоёр дахь нь тухайн өдөртөө зарагддаг тоотой хэдхэн тасалбар дээр “алалцах”. Бүр тодруулбал билетийн кассыг онгойтол шөнөжин дугаарлаж байгаад худалдаж авна гэсэн үг. Өвлийн хүйтэнд өглөөний 03.00 цагаас авахуулаад дугаарлана гэдэг ихээхэн тэсвэр тэвчээр шаардах нь мэдээж.

Удаах нь чоно борооноор гэдгийн үлгэрээр энэ үеийг алдалгүй ашиглаж сурсан шагчидаас худалдан авах юм. Жил бүр сөхөгддөг шагийн билетний асуудлыг УБТЗ-ынхан үгүйсгэдэг ч одоо хэр нь байгааг олон хүн гэрчилнэ. Уг нь Замын-Үүд-Эрээн чиглэлийн галт тэрэгний нийтийн вагоны билет 9600, тасалгаат нь 27300, купэ нь 39200 төгрөгийн үнэтэйгээр худалдаалдаг. Эх сурвалжийн мэдээлж буйгаар шагчид тасалгаат вагоны тасалбарыг 40 мянга, купэг нь 50 мянган төгрөгөөр зардаг аж.

Энэ үед наймаачид олдсон тасалбараа авдаг нь ганц хоногийн өмнө ч гэсэн бараандаа явж ирээд борлуулж эхлэх гэснийх. Тэдний хэлснээр нэмэлт галт тэрэг гарч байгаа боловч тасалбарын олдоц муу, хол замд явдаг болохоор зөөлөн суудал нь хамгийн түрүүнд дуусчихдаг гэнэ. Энэ асуудалд УБТЗ-ынхан хэдэн вагон нэмж явуулахаас өөрийг хийж байгаагүй бөгөөд шагчидтай тэмцэх нь цагдаа нарын хийх ажил гээд хээвнэг сууж байдаг. Үнэндээ овоо босгоогүй бол шаазгай юунд суух вэ гэгчээр салбартаа монополь энэ байгууллага дорвитой арга хэмжээ аваад байдаг бол иргэд ингэтлээ зовох хэрэг юун.