Хууль сахиулахын их сургуулийн 80 жил, Гал түймэртэй тэмцэх байгууллагын 93 жил, Онцгой байдлын байгууллагын 10 жилийн ойг угтан Онцгой байдлын сургуульд Гал түймэртэй тэмцэх байгууллагын ахмад ажилтан, хурандаа Т.Лхамжав агсны нэрэмжит Гал түймэртэй тэмцэх албаны танхимыг шинээр нээлээ. Тус арга хэмжээнд Хууль сахиулахын их сургуулийн захирал, профессор, цагдаагийн хурандаа Р.Чингис, Захирлын зөвлөлийн гишүүд, ОБЕГ-ын удирдлагууд болон хошууч генерал О.Отгонжаргал, бэлтгэл хурандаа Т.Лхамжав агсны гэр бүлийнхэн, ахмад ажилтнууд, багш, сонсогчид оролцов.
Бэлтгэл хурандаа Т.Лхамжав агсан улсад 40 гаруй жил ажиллах хугацаандаа нийслэл хот, хөдөө орон нутагт гарсан онц ноцтой 3800 гаруй гал түймрийг унтраах ажлыг удирдлага зохион байгуулалтаар ханган ажиллаж, 120 гаруй хүний амь нас, олон зуун сая төгрөгийн өмч хөрөнгийг гал түймрийн аюулаас авран хамгаалсан галын байгууллагын баатар байсан аж.
Хурандаа Т.Лхамжав агсан “Гал унтраах арга зүй”, “Галын техник, автомашин 1, 2 боть”,”Гал сөнөөгчдын сэтгэл зүйн бэлтгэл”,”Гал унтраахад ашиглах лавлах”,”Мотопомп -800 ажиллуулах заавар”,“Галын техник спортын улсын нэгдсэн ангилал”, ГТТБ-ын товч түүх зэрэг анхны дүрэм, журам, заавар бүхий ном сурах бичгийг боловсруулжээ. Түүний энэхүү ном, сурах бичиг, гарын авлагыг тус сургуулийн профессор, судлаач, багш, сонсогч нар сургалтад ашиглаж байна.
Уг арга хэмжээний үеэр Т.Лхамжав сан”-гийн шагналаар сурлага, спортод амжилт гаргасан 631-р дамжаа сонсогч Д.Энхтүвшин, 621-р дамжаа сонсогч Г.Амарболд, 641-р дамжааны сонсогч Б.Билгүүн Х.Цэнд-Очир нарт Т.Лхамжав агсны гэр бүлийн хүн З.Ундармаа, хүү Баянгол дүүргийн цагдаагийн цагдаагийн хурандаа Л.Батбаяр нар гардууллаа.
Мөн энэ үеэр Ёс журам бэлэн байдлын газар, Ахлагчийн сургууль, Онцгой байдлын сургуулийнхан болон Онцгой байдлын албаны чиглэлээр суралцаж байгаа сонсогчид Гамшгаас хамгаалах команд штабын сургалтыг зохион байгууллаа. Тус сургалтаар Онцгой байдлын албаны чиглэлээр сурч буй сонсогчид байлдааны тархалтын үзүүлэх сургууль, гал унтраах үзүүлэх сургалт болон дадлагаар олж авсан мэдлэг, чадвараасаа үзүүлж сонирхуулсан юм.
