Зуслангийн газрыг энэ сараас эхлэн иргэдэд өмчлүүлнэ хэмээн Нийслэлийн газрын албанаас мэдээлж байсан ч хугацааг нь хойшлуулж ирэх дөрөвдүгээр сард болголоо. Ингэхдээ газар өмчлөх хүсэлтэй иргэдийг дөрөвдүгээр сараас эхлэн онлайнаар бүртгэж эхлэх юм байна. Нийслэлд энэ жилээс эхлэн гэр бүлийн зориулалтаар 52 байршилд шинээр газар өмчлүүлэхээр болсон. Өнгөрсөн арванхоёрдугаар сард иргэдэд өмчлүүлэх дээрх газруудын байршил зүйн зураг гаргах ажил хийгдэж дууссан. Өнөөдрийн байдлаар хэсэгчилсэн зураг төсөл буюу төлөвлөлтийн  ажил хийгдэж байгаа аж.

Энэхүү ажил хийгдсэний дараа нийт хэдэн хүнд хэчнээн га газар өмчлүүлэх нь тодорхой болох юм байна.

Үүнтэй холбоотойгоор газар өмчлөх хүсэлтэй эх орондоо амьдарч байгаа болон гадаадад байдаг иргэд тодорхой байршлуудад газар өмчлөх бүрэн боломжтой болжээ.

Өөрөөр хэлбэл газар өмчлөхийг хүссэн иргэдийн өргөдлийг онлайнаар хүлээн авах гэж байгаа бөгөөд одоогоор программыг нь боловсруулж байгаа аж. Иргэдийг бүртгэх ажил төлөвлөгөөний дагуу ирэх дөрөвдүгээр сарын нэгнээс хэрэгжиж эхлэх юм байна.

Бүртгэл эхэлсэн тохиолдолд газар өмчлөх эрх нь үүссэн буюу бүртгэлийн код ирсэн иргэд л газар өмчлөх материалаа бүрдүүлэх шаардлагатай аж. Жишээлбэл Баянзүрх дүүргийн нэг байршилд нийт 5000 иргэнийг бүртгэсэн бол программын оноолтын системээр 3000 иргэнд л газар өмчлөх эрх үүснэ гэсэн үг. Эрх үүссэн иргэдийн утсанд код ирнэ. Тэрхүү кодоо өөрийн харьяа дүүрэгт хүлээлгэж өгснөөр бүрдүүлэх материал нь тодорхой болох юм байна.
Харин код ирээгүй иргэд газаргүй үлдэх юм байна.

Дашрамд дуулгахад, Нийслэлийн Засаг даргын захирамжийн дагуу шинээр өмчлүүлж байгаа 52 байршлыг шууд өмчлүүлнэ гэж заасан байгаа бөгөөд газрын гэрчилгээ өгөхгүй юм байна.