Цэргийн сонины анхны дугаар хэвлэгдсэний 90 жилийн ойд зориулсан “Уншигчидтайгаа хамт 90 жил” үзэсгэлэнгийн нээлт, “Монголын цэргийн сонины үүсэл, хөгжил, шинэчлэл” сэдэвт эрдэм шинжилгээний бага хурал өчигдөр “Монгол цэргийн музей”-н үзэсгэлэнгийн танхимд боллоо.  Үзэсгэлэнгийн нээлтэд ССАЖ-ын сайд Ц.Оюунгэрэл, БХ-ын дэд сайд А.Баттөр болон хоёр яамны удирдлагууд, цэргийн сонины үе үеийн төлөөлөл, Зэвсэгт хүчнийхэн, мөн дүүргийн удирдлагууд хүрэлцэн ирсэн байлаа.

Монгол цэргийн музейнхны саяхан бий болгосон Хүндэтгэл ёслолын саран өргөөнөө үзэсгэлэнгийн нээлтийн туузаа хайчилж, нээсэн нь сонирхолтой боллоо.
Монголд хувьсгалыг дархалж, тусгаар тогтнолыг зарлаж, дарийн утаа үнэрлэж, ардчиллын үзэл санааг нэвтрүүлж, чөлөөт хэвлэлийн шанг татан 90 жилийн турш “Монгол улсын төлөө зүтгэе” хэмээх тангарагтаа үнэнч явсан ховорхон хувь тавилан гагцхүү цэргийн сонин, түүнийг эрхлэн гаргаж байсан оюунлаг, зоригтой, авьяаслаг сэтгүүлчдийн гавьяа билээ. Тиймээс ч “Уншигчидтайгаа хамт 90 жил” үзэсгэлэнгийн хамгийн нандин үзмэрүүд нь 1924 оны 2 дугаар сарын 5-нд их зохиолч Д.Нацагдоржийн оюуны бяд, бийрийн татлаганаас мэндэлсэн “Ардын цэрэг” сонины анхны дугаараас эхлээд “Улаан одон”, 60 жилийн турш замнасан “Улаан од”, шинэ цагийн салхийг өртөөлсөн “Тусгаар тогтнол”, өнөөгийн “Соёмбо” сонинуудын нэрээ өөрчилсөн анхны дугаарууд, 1939 оны Халхын голын дайн, 1945 оны Чөлөөлөх дайнд оролцож, дарийн утаа үнэртсэн шаргал хуудсууд, 1974 онд төрийн хошой одон хүртсэнээс хойш “Улаан од” сонины магнай дээр заларч ирсэн гуулин дардас, тугалга цутгаж сонин хэвлэж байх үеийн ховорхон үзмэрүүд энд дэлгэгдсэн байна.

Мөн энэхүү үзэсгэлэнд үе үеийн сэтгүүлчдийн хэрэглэж байсан гэрэл зургийн аппарат, дуу хураагч, бичгийн машинууд бий. Тухайлбал, “Улаан од” сонины гэрэл зурагчин Б.Батаагийн “Зенит” аппарат, Иракт алан хядагчдын дэлбэрэлт болсон газраас цэргийн сэтгүүлч С.Зоригтбаатарын цусаа дуслуулан байж очиж зураг авсан “Минолта” аппарат, сайдаас бэлгэнд ирсэн анхны дижитал аппарат гээд дурсамж дүүрэн эд өлгийн зүйлс олон байна.

Үзэсгэлэнгийн нээлтийн дараа цэргийн сонины үе үеийн төлөөлөл, сэтгүүл зүйн судлаач, шүүмжлэгчид оролцсон “Монголын цэргийн сонины үүсэл, хөгжилт, шинэчлэл” эрдэм шинжилгээний бага хурал боллоо.  Цэргийн сонины түүхэн замнал, нийгэмд гүйцэтгэсэн үүрэг, ардчилсан үзлийн төлөвшилтөнд оруулсан хувь нэмэр зэрэг сэдвээр доктор, бэлтгэл хурандаа Х.Шагдар, “Львов клуб” ТББ-ын гүйцэтгэх захирал, сэтгүүл зүйн ухааны доктор, бэлтгэл хурандаа Г.Сумьяа, Соёлын гавьяат зүтгэлтэн, доктор, бэлтгэл хурандаа А.Баярмагнай, Б.Чантуу нар илтгэл тавихаас гадна  “Улаан од” сонин Монголын чөлөөт хэвлэлийн эх болох талаар “Сэрүүлэг констракшн” компаний захирал, сэтгүүлч С.Баярмөнх, Олон улсын энхийг дэмжих ажиллагаан дахь цэргийн сонины гүйцэтгэж буй үүргийн тухай “Соёмбо” сонины сурвалжлагч, ахлах дэслэгч Д.Мэндбаяр, Цэргийн сонины өнөөгийн байдал, цаашдын чиг хандлагын талаар “Соёмбо” сонины эрхлэгч, хурандаа Г.Нямдорж, орлогч эрхлэгч, дэд хурандаа П.Батнайрамдал нар илтгэж, хуралд оролцогсдын санал сэтгэгдлийг сонслоо.

“Соёмбо” сонины хамт олон Монгол улсын салбарын шилдэг хэвлэлээр 2010, 2013 онуудад шалгаран, Монголын сэтгүүлчдийн эвлэлийн өргөмжлөл хүртсэн, мөн цэргийн сонины түүхийг харуулсан гэрэл зургийн цомог, цэргийн сэтгүүлчдийн ажил амьдралын тухай түүхийн ном зэргийг бүтээсэн өрнүүн амжилтаар 90 жилийнхээ ойг угтжээ.

Батлан хамгаалах яам