"Гал үндэстэн" холбооны тэргүүн Ц.Мөнхбаяр нарт 21.6 жилийн хорих ял оноосон.  Харин ар гэрийнхнийх нь зүгээс Давж заалдах шатны шүүхэд гомдол гаргахаар зэхээд байгаа. Иргэдийн хувьд тэдний ялын хэмжээг зөв гэж үзэж байгаа хүмүүс байгаа ч буруутгаж байгаа нь олонх хувийг эзэлж байна гэхэд болно. Түүнчлэн УИХ-ын зарим гишүүд  тэднийг үйлдлийг зөвтгөж, ялын хэмжээг буруутгаад байгаа юм.

Тодруулбал, Ё.Отгонбаяр, С.Ганбаатар, Г.Уянга, Ж.Батзандан гэх мэт гишүүд тэднийг ийн ялласныг буруутгаад байна. Тухайлбал Ж.Батзандан гишүүний хувьд "Ц.Мөнхбаярт ял өгөх бус шагнал өгөх ёстой. Би Байгаль орчин, эх орныхоо төлөө тэмцдэг хүн бүрийг хамгаална. Асуудал Ц.Мөнхбаярт байгаа биш түүний тэмцлийн гол зорилгод байгаа. Засгийн газар хуулиа дагахгүй хэрнээ яах ч үгүй, харин иргэн нь хуулиа биелүүлэхийг шаардсаны төлөө ял авлаа. Ц.Мөнхбаяр УИХ-ын хууль, тогтоолыг хэрэгжүүлэхийг, УДШ-ээс хуулийг хэрэгжүүлэхийг ЗГ-д даалгасан шийдвэрийг хэрэгжүүлэхийг шаардаж тэмцсэн" гэв. Тэрбээр маргааш Ц.Мөнхбаяртай уулзана гэж байсан ч өнөөдөр болгож наашлуулжээ. Тиймээс Ж.Батзандан гишүүн Хорих 461 дүгээр ангийг удахгүй зорих гэж байна.