Монгол Улсын Прокурорын байгууллагын тухай хуулийн 42 дугаар зүйлд: “Нийт прокурорын үйл ажиллагаа мэргэжлийн түвшинг гурван жилд нэг удаа шалгаж дүгнэнэ“ гэж заасан. Хуулийн энэ заалтын дагуу Прокурорын мэргэжлийн хороо 2013 оны 10 дугаар сарын  21-ээс 11 дүгээр сарын 11-н хүртлэх хугацаанд улсын хэмжээнд ажиллаж байгаа 400 прокурорын үйл ажиллагаа, мэргэжлийн түвшинг тусгай үзүүлэлтээр шалгаж, дүгнэсэн.

Шалгалтыг Улсын Ерөнхий Прокурорын тушаалаар байгуулагдсан ажлын хэсэг  шалгаж тогтоохдоо эрүүгийн хэргийн зүйлчлэлийг прокурор хэрхэн хууль зүйн үндэслэлтэй, зөв хийж байгаа, тухайн прокуророос сүүлийн 3 жилд хийсэн ажлын  үзүүлэлт ямар байгаа, хяналтын ажилд дагаж мөрдөх аргачилсан заавар болон удирдамжийн бусад бичиг баримтын мэдлэг, хэрэглэх чадвар ямар байгаа, үндэсний монгол бичгээр бичих, унших чадвар зэрэг үзүүлэлтүүдээр шалгаж, прокурор нэг бүрийн сахилга хариуцлага, хариуцсан ажлыг  үнэлэн  дүгнэж, шалгалтаар авсан нийт оноог харгалзан “дүүрэн хангалттай”,“хангалттай”,“ дундаж “ , “хангалтгүй “ гэсэн үнэлгээ өгч дүгнэжээ.

Шалгалтын ажлын хэсэг шалгалтын эцсийн дүнг нэгтгэн гаргаж, Улсын Ерөнхий прокурорын дэргэдэх зөвлөлийн хуралдаанаар хэлэлцүүлж, цаашид авах арга хэмжээний талаарх саналаа танилцуулсан байна. Шалгалтын дүнг үндэслэн шалгалтанд “дундаж“ үнэлгээ авсан прокуроруудыг цаашид сургалтанд хамруулахаар шийдвэрлэсэн бөгөөд энэ ажлыг УЕПГ-ын дэргэдэх Прокурорын сургалт судалгааны төв хариуцан гүйцэтгэх юм.

Түүнчлэн шалгалтанд “дундаж“ үнэлгээ авсан прокуроруудад цаашид эрүүгийн хэргийн зүйлчлэл болон хууль хууль хэрэглэх чадвараа дээшлүүлэх, удирдамжийн бичиг баримт болон шүүх эрх мэдлийн шинэтгэлийн хүрээнд батлагдан гарч байгаа хууль тогтоомжуудыг судалж хэрэгжүүлэх зэрэг асуудлаар Улсын Ерөнхий Прокурорын Газрын даалгаврыг хүргүүлсэн байна.

Шалгалтын дүнгээс үзэхэд шалгалтанд хамрагдсан нийт прокуроруудаас  121 нь  буюу 30,2 хувь нь дундаж гэсэн үнэлгээ авсан байх тул  ийм  үнэлгээг авсан прокурорууд  УЕПГ-аас өгсөн албан даалгаврын биелэлтийг 2013 оны 12 дугаар сарын 10-ны дотор илтгэх хуудсаар гаргаж танилцуулах ажээ.