АНУ-ын Хавайн  мужийн 2-р тойргийн шүүхийн Ерөнхий шүүгч асан Shackley f. Raffetto-гийн урилгаар Улсын Ерөнхий Прокурор, Нийслэл, аймаг, дүүргийн  прокурорын газрын прокурорууд тус мужийн Maui, Honolulu хотод сургалтанд оролцоод ирлээ.

2014 оны 01-р сарын 20-ноос эхлэн 7 хоногийн хугацаатай явагдсан сургалтанд Улсын Ерөнхий Прокурорын туслах, Эрх зүйн туслалцаа, Гадаад харилцааны хэлтсийн дарга Г.Ганзориг, Нийслэлийн прокурорын газрын туслах прокурор Д.Отгонбаяр, Нийслэлийн прокурорын газрын хяналтын прокурор Б.Эрхэмбаяр, Багануур дүүргийн прокурорын газрын хяналтын прокурор Д.Дашцэрмаа, Завхан аймгийн прокурор Н.Доржсүрэн, Сэлэнгэ аймгийн прокурорын газрын хяналтын прокурор Н.Гэрэлмаа, Ховд аймгийн прокурор Б.Ганбаатар, Хэнтий аймгийн прокурорын газрын хяналтын прокурор Ц.Цэен-Ойдов нар оролцсон байна.

Тус мужийн Maui тойргийн Ерөнхий шүүгч асан, Shackley f. Raffetto Тойрогийн Ерөнхий прокурор  J.D Kim болон Maui тойргийн шүүхийн бусад шүүгчид Хавай муж улсын шүүх, прокурорын байгууллагын бүтэц, тогтолцоо, шүүн таслах ажиллагаа, түүнд гүйцэтгэх прокурорын үүргийн талаар лекц уншин дэлгэрэнгүй танилцуулга хийж, Монголын прокуроруудад зориулан сургалт явуулжээ.

Сургалтын явцад, яллагдагчийн гэм бурууг тогтоох шүүн хуралдаан болон түүнээс тусдаа явагдаж байгаа яллагдагчид ял шийтгэл оногдуулах асуудлыг шийдвэрлэж байгаа нээлттэй шүүх хуралдааны ажиллагаанд прокурорууд оролцож ажиглалт хийж, шүүгч прокуроруудтай харилцан ярилцлага хийсэн байна.

Хавай мужид яллагдагчийн гэм буруугийн асуудалд оногдуулах ял шийтгэлийн талаар шүүгдэгч, өмгөөлөгч, улсын яллагч нар тохиролцоо хийж, бичгээр гэрээ үйлдэх бөгөөд энэ гэрээг шүүгч шүүх хуралдааны явцад дахин хянаж зөвшөөрөн гарын үсэг зурсанаар уг гэрээ сая хүчин төгөлдөр болдог ажээ. Харин шүүгч зөвшөөрөөгүй татгалзсан нөхцөлд тохиролцоо хийхгүйгээр шүүх хуралдааны ажиллагааг ердын журмаар явуулдаг байна.

Харин шүүн таслах ажиллагаанд хохирогчийн өмгөөлөгч гэх хүн тусдаа оролцдоггүй бөгөөд хохирогчийг улсын яллагч бүрэн төлөөлдөг ажээ.

Түүнчлэн олон хэргүүд  дээр шүүхээс томилсон төрийн өмгөөлөгч шүүн таслах ажиллагаанд оролцон төлбөрийн чадваргүй хүмүүсийн эрх ашгийг хамгаалдаг байна.

Хавай мужийн нийслэл Honolulu хотод Монголын прокурорууд тус мужийн Дээд Шүүхийн ерөнхий шүүгч Mark Recktenwold, Хавайн муж улсын Ерөнхий Прокурор David Loui нартай уулзаж Монгол Улсын Ерөнхий Прокурорын газар, Хавай мужийн хууль, шүүх, прокурорын байгууллагын хамтын ажиллагааны талаар санал солилцон ярилцжээ.

Улсын Ерөнхий Прокурорын туслах, Эрх зүйн туслалцаа, Гадаад харилцааны хэлтсийн дарга Г.Ганзориг, Хавайн мужийн Ерөнхий Прокурорын газартай сургалт явуулах, харилцан төлөөлөгчид солилцох, прокурорын байгууллагын үйл ажиллагааг боловсронгуй болгох хууль журмыг боловсруулах чиглэлээр хамтран ажиллах санал тавьсаныг Ерөнхий Прокурор  David Loui нааштайгаар хүлээн авч энэ талаар хамтран ажиллах боломжтой тухайгаа мэдэгдсэн байна.

АНУ-ын Хавайд сургалтанд оролцсон монголын прокурорууд хүний эрх, эрх чөлөөг хамгаалах, шударга шүүн таслах ажиллагааг хэрэгжүүлэх талаар олон шинэ зүйлийг суралцсан бөгөөд тэд энэ талаар тусгай сургалтын сэдэв бэлдэж, УЕПГ-ын дэргэдэх “Сургалт судалгааны төв” дээр бусад прокуроруудад зориулан сургалт явуулахаар төлөвлөж байна.

Түүнчлэн Монгол улсад эрчимтэй өрнөж байгаа шүүхийн шинэтгэлийн болон АНУ-д прокуроруудыг сургах хэрэгцээ шаардлагын талаар Улсын Ерөнхий Прокурорын туслах, Эрх зүйн туслалцаа, Гадаад харилцааны хэлтсийн дарга Г.Ганзориг “The Maui News” сонинд  болон Honolulu хотын телевизэд ярилцлага өгчээ.