Сочигийн олимп оролцож буй манай хоёр тамирчны хувцас нэг хэсэгтээ л шүүмжлэлийн бай болсныг та бүхэн тодхон санаж байгаа байх. Тамирчдын нээлтийн ёслолд өмсөх хувцсыг дизайнер Ариунаа Сүри сайжруулсан бөгөөд тэр нь ч амжилттай болж тамирчдын маань хувцас дэлхийд гуравт бичигдсэн билээ.

Тэгвэл дизайнер Ариунаа Сүри энэ талаар "Өнгөрсөн нэгдүгээр сард Ц.Оюунгэрэл сайд биднийг дуудаж уулзаад "Сочи явах тамирчдын маань хувцас загвар дээр хамтран ажиллаач" гэсэн. Бид энэ саналыг маш их баярлаж хүлээж авсан. Ямар гоё юм бэ бидэнд итгэж байна, намайг үнэлж байна гэж хүлээж авсан болохоор "Би үүн дээр хөдлөх ёстой. Хичнээн хугацаа шахуу байгаа ч заавал амьжуулна шүү" гэж бодсон. Тэгээд л тухайн үед хийж байсан бүх ажилаа хойш тавиад ажилласан юм. Хувцсыг нь хартал өнгө дутуу, Монгол гэх илэрхийлэмж байгаагүй. Тэр үед гуравхан өдрийн хугацаа байсан. Мэдээж хэрэг гурван өдөрт багтаж хувцсыг иж бүрнээр нь шинэчлэх боломжгүй. Тиймээс яаж өөд нь татах вэ гэж бодсон. Ингээд малгай ороолт бээлийг нь шинэчилье гээд өнгө нэмэхээр болсон юм. Өмнөх загвар нь шар хар өнгөний хослолтой байсан. Ууланд өмсөх хувцас нь саарал хүрэм байлаа. Тэгэхээр нь Мизүно брэндийн хүрэмний өнгийг номин цэнхэрээр солиулсан. Нээлтийн үеэр өмсөх хар хөх ноолууран хүрэм холоос харахад ноолуур шиг харагдахгүй байсан. Дээрээс нь өнгө муутай байсан болохоор номин цэнхэр өнгийн малгай ороолт бээлийний хослол оруулж өгсөн... Нээлт үзэж байхад за ямар харагдах бол гээд зурагтны өмнө сууж байсан. Уг нь хүрэмнийхээ дотуур цагаан цагаан өнгийн цамц өмсөнө гэж байсан ч шарыг өмссөн байна лээ. Тиймээс нөгөө номин цэнхэр өнгө маань жаахан урвасан харагдсан. Гэхдээ өнгөний хослол гайгүй болсон байх" гэжээ.