Мэргэжлийн хяналтын байгууллагын хэмжээнд сахилга хариуцлагыг дээшлүүлэх, авлига, ашиг сонирхлын зөрчлөөс ангид байх нэг сарын аяныг зарласантай холбогдуулан Мэргэжлийн хяналтын ерөнхий газрын даргын үүргийг түр орлон гүйцэтгэгч Д.Батмөнх тэргүүтэй МХЕГ, НМХГ-ын удирдлагууд өнөөдөр Сүхбаатар, Баянзүрх, Хан-Уул, Баянгол дүүрэг дэх Мэргэжлийн хяналтын хэлтсүүдийн ажил, байдалтай танилцаж, улсын байцаагчид, албан хаагчидтай уулзан, санал бодлыг сонсч, тулгамдаж буй асуудлуудыг шийдвэрлэх талаас нь ярилцлаа. Уулзалт ярилцлагад тухайн дүүргийн Засаг дарга, Засаг даргын орлогч нар оролцож хамтран ажиллах, зарим асуудлыг шийдвэрлэх талаар ярилцсан юм. Уулзалтаар дүүргийн Мэргэжлийн хяналтын хэлтсийн хийж гүйцэтгэж буй үйл ажиллагаа, хяналт шалгалтын талаар танилцуулснаас гадна улсын байцаагчдын санал, хүсэлт, бэрхшээлийн талаар сонссон бөгөөд улсын байцаагчийн зэрэг дэв, цалин, хангамж, халамжтай холбоотой асуудлууд нийтлэгээр тавигдаж байлаа. Мөн Баянгол, Баянзүрх дүүргийн Мэргэжлийн хяналтын хэлтсийн ажлын байрны асуудал чухлаар тавигдсан.

Мэргэжлийн хяналтын хэлтсүүдийн өнгөрсөн онд хяналт шалгалт хийсэн дүнгээс үзэхэд төлөвлөгөөт бус хяналт шалгалт нь төлөвлөгөөт шалгалтаас их байгаа нь хороо, СӨХ, цагдаа зэрэг бусад байгууллагуудаар шийдвэрлэх боломжтой асуудлуудыг мэргэжлийн хяналтын байгууллага руу шилжүүлдэгтэй холбоотой гэж үзэж байгаагаа хэлтсийн дарга нар хэлж байлаа. Тэгвэл мэргэжлийн хяналтын хэлтсүүдийг харъяа дүүргийнхээ Засаг дарга, удирдлагуудад хяналтын байгууллагын чиг үүргээ сайтар таниулан, нягт хамтран төлөвлөгөө, хөтөлбөр боловсруулж ажиллах шаардлагатайг Д.Батмөнх хэлэв. Мөн уулзалт ярилцлагаас гарсан санал хүсэлт, асуултыг МХЕГ-т хүргүүлэн, хариуг авч ажиллахыг хяналтын хэлтсийн дарга нарт үүрэг болгосон юм.

Уулзалт ярилцлагын дүнд дүүргүүдийн Засаг дарга нарын зүгээс Мэргэжлийн хяналтын хэлтэст тулгамдаж буй байр, унаа зэрэг асуудлуудыг шийдвэрлэх талаар нааштай хариу өгсөн юм. МХЕГ, НМХГ-ын удирдлагууд 14-нд Сонгинохайрхан, Чингэлтэй дүүрэг дэх Мэргэжлийн хяналтын хэлтсийн үйл ажиллагаатай танилцаж, улсын байцаагчидтай уулзана.