Нийслэлийн дүүргүүдийн Засаг дарга нар өнөөдрөөс  хоёр өдрийн турш Батлан хамгаалах яам болон Таван толгой дахь Зэвсэгт хүчний сургалтын нэгдсэн төвд цэргийн бэлтгэл сургалтанд хамрагдана. Сургалтын нээлтэд Нийслэлийн Засаг Даргын Тамгын Газрын дарга Ё.Гэрэлчулуун хүрэлцэн ирсэн бөгөөд БХЯ, Нийслэлийн цэргийн штабын удирдагууд байлцлаа.

Дайчилгааны тухай хууль болон Монгол улсын ерөнхийлөгчийн зарлигаар улсын эдийн засаг, нийгмийг шаардлагатай үед дайны байдалд шилжүүлэх, цэргийн дайчилгааны бэлэн байдлыг хангах зорилгоор улс төрийн албан тушаалтнуудыг 1-4 жилийн хугацаанд 7 хүртэлх хоногоор цэрэг-стратегийн бэлтгэл сургалтад тогтмол хамруулах ёстой. Батлан хамгаалах яам хүлээсэн үүргийнхээ дагуу дээрх сургалтуудыг шат дараалан зохион байгуулж байгаа билээ.

Нийслэлийн есөн дүүргийн Засаг дарга нар уг сургалтын үеэр БХЯ-ны үйл ажиллагаатай танилцан, улсын Батлан хамгаалах бодлого, улсын дайчилгааны төлөвлөлт, лайчилгааны бэлтгэл үүрэгтний сургалтыг орон нутагт зохион байгуулах, орон нутгийн хамгаалалтын талаар номын дуу сонсч, Бүх цэргийн Хар сүлдэндээ хүндэтгэл үзүүлэх бөгөөд дараа нь Зэвсэгт хүчний 084 дүгээр ангиар зочилж, орчин үеийн буудлагын зэвсгийн үзэсгэлэн, ангийн бие бүрэлдэхүүний гардан тулаан, обьект чөлөөлөх, олзны хүн аврах зэрэг ажиллагааг үзэж сонирхоно. Мөн Зэвсэгт хүчний сургалтын нэгдсэн төвд байрлан Монгол улсын батлан хамгаалах үйл ажиллагааг нийслэл, дүүргийн хэмжээнд сурталчлах, цэргийн алба хаах хэлбэрүүд, тэдгээрийг зохион байгуулж буй өнөөгийн байдал, цэрэг татлага, түүнтэй холбоотой цаашид анхаарах асуудлууд зэргийн талаар санал солилцож, ЦДБЭЧ-ын уран бүтээлчдийн тоглолтыг сонирхоно. Мөн Зэвсэгт хүчний ангийн үзүүлэх сургуулийг үзэж, буудлага, жолоодлого зэрэг цэргийн бэлтгэл сургуулилт, дадлага хийнэ.