Бидний хэн нь ч ямар нэг зуршилтай болж байгаагаа анзаарч мэддэггүй. “Гэм биш зан” болох шахсан үед нь гэнэт анзаараад хаяхыг хүсэх боловч төдийлөн чаддаггүй билээ. Танд эмэгтэйчүүдэд түгээмэл ажиглагддаг 5 муу зуршлаас хэрхэн хагацах талаар зөвлөгөө бэлтгэлээ.


Каффейнд дурлах
Кофены фанатууд энэ зуршлаа хаяхгүй бол тархинд нь гэнэт цус харвах магадлалтай байдгийг судлаачид баталжээ.Өдөр бүр өндөр хэмжээгээр каффейн хэрэглэх нь хүний уур уцаарыг ихэсгэж, түргэн зантай болгоод зогсохгүй гарны тогтвортой байдлыг алдагдуулдаг аж. Мөн Дартмауфын Анагаах Ухааны Их Сургуулиас хийсэн судалгааны дүнгээр зөвхөн 7 хоногийн турш өдөрт 400 мг каффейн буюу ойролцоогоор 4 аяга кофе уусан хүмүүсийн инсулины мэдрэмтгий байдал 35 хувиар буурч байгаа нь тогтоогджээ. Энэ нь чихрийн шижингээр өвчлөх магадлалыг мөн төдий чинээгээр ихэсгэж буй аж.
Зуршлаа хаях: Хэд хоногийн турш идэж, ууж байгаа бүх зүйлээ жагсааж бичээрэй. Ингэвэл та өөрийнхөө өдөрт каффейн агуулсан бүтээгдэхүүнүүд болох хийжүүлсэн ундаа, кофе, сэргээш зэргийг хир их хэрэглэж байгаагаа тооцоолж чадна. Тэгээд дараагаар нь ууж байгаа каффейныхаа хэмжээг 10 хувиар багасгах зорилт тавь.

Чихэвчний хөгжмөө чангалах
Компьютерийн өмнө сууж байхдаа, эсвэл гадуур алхаж байхдаа чихэвчний хөгжмөө хэвийн хэмжээнээс чанга дээр нь тавьж сонсох нь таны чихийг аажмаар үүнд дасгаж орхидог. Тэгээд өөрөө ч мэдэлгүй бага багаар улам чанга дээр нь тавьж сонсдог болох болно. Бидний бие организм чанга дууны өмнө “хүчин мөхөс” тул, байнга энэ зуршлаа давтах нь сонсголгүй болгох аюултай. Учир нь таны чихэн доторхи дуу чимээг боловсруулдаг эсүүд хүчтэй стрессийн дор үхчихдэг юм.

Зуршлаа хаях: Та тархиа буцааж нам хөгжминд дасгах хэрэгтэй. Хамтдаа яваа хүмүүсийнхээ яриаг маш тод сонсдог болох хүртлээ iPod, машиныхаа хөгжмийг султгаарай. Хэрэв та хүчээр ч хамаагүй өөрийгөө нам хөгжмөнд дасгавал долоо хоногийн дараанаас л та энэ зуршлыг хаяж чаддаг болно.

Мөнгө үрэх зуршил
Өрний бичгээр хэтэвчээ дүүргэчихээд, бараг л утас дуугарах болгонд “Хэнд мөнгө өгөх ёстой билээ?” гэж боддог мөртлөө брэндийн дэлгүүрт шинэ бараа ирэх өдрийг алгасалгүй очдог бол т энэ зуршилд автчихжээ. Шопахолик бол нэгэн төрлийн өвчин ба эрүүл мэндэд ноцтой хохиролгүй хирнэ таны амьдралыг баллаж дөнгөх зүйл юм шүү.

Зуршлаа хаях: Хэрэв та зээлийн карт ашигладаг бол дэлгүүр хэсэх үедээ түүнийгээ гэртээ орхих, эсвэл өөрөөсөө нуух хэрэгтэй. Тэгээд зөвхөн өөрт байгаа бэлэн мөнгөндөө л тохируулж худалдаж ав. Түүнээс гадна танд зайлшгүй хэрэгтэй байгаа зүйлс болон зүгээр л авахыг хүсч байгаа зүйлсээ хооронд нь ялгаж салгаж сураарай. Бүр жагсаалт гаргаад биччихсэн ч болно. Танд одоохондоо шинэ загварын цүнхнээс илүүтэй байрныхаа мөнгийг төлөх шаардлага нь өндөр гэдгийг сана. Маникенд зүүлттэй байгаа ороолтыг авах хүсэлдээ дийлдчих гээд байвал хэн нэг найзыгаа дагуулж цуг дэлгүүр хэс. Таны найз дэмий зүйлд мөнгө зарцуулах гээд байгааг тань сануулах болно.

Хов жив ярих
Найзуудаараа цуглаад хорвоогийн сонин хачныг хүүрнэж суух нь эмэгтэйчүүдийн стресс ядаргааг тайлдаг нь батлагдсан зүйл. Гэвч хов живийг өөрийнхөө үүрэгт ажлаас дутуугүй чухал зүйлд тооцдог болж, үүнд хамаг оюун бодлоо шавхан суудаг бол энэ нь гарцаагүй муу зуршил юм.

Зуршлаа хаях: Үргэлж хов жив ярихад тань “тус дэм болдог” найзуудтайгаа ойр ойрхон уулзахаа болиорой. Хэрэв таны эргэн тойрон дахь хүмүүс хов жив ярих гээд эхэлвэл сэдвийг өөрчлөх юм уу, амаа жимийгээд чимээгүй л сонсож сурах хэрэгтэй. Мөн хэн нэгнийг муулах гээд ирвэл тэр хов живийн эзэн нь яг дэргэд чинь байна гээд төсөөлөөд үзээрэй. Түүний талаар юу гэж ярьж байгааг тань сонсвол түүнд ямар таагүй сэтгэгдэл төрөхийг төсөөлөөд үзээрэй. Таны талаар ч бас хэн нэгэн ингэж ярихыг сонсвол яах бол?

Хумсаа мэрэх
Хумсаа мэрэх зуршил нь эрүүл мэнд, ариун цэврийн хувьд маш бохир бөгөөд хортой зуршил юм. Хэрэв бүсгүй та ямар нэг юмны талаар удаан бодсон үедээ, эсвэл өөрийн мэдэлгүй л хумсаа мэрчихдэг зуршилтай бол хамгийн наад захын бөгөөд амархан арга бол манкюр хийлгэх явдал. Гоёмсогоор засч янзлуулсан хумсаа мэрээд л муухай болгохыг хэн хүсэх билээ? Эсвэл хумсаа урь ургуулах хэрэггүйг, богино байлгах хэрэгтэй. Хэрэв таны гар ам руу чинь ойртоод ирвэл ямар нэг зүйл барьж, гараа завгүй байлга.