МУГЖ С.Жавхлан төрсөн өдрөө фенүүдтэйгээ тэмдэглэхээр “Монголд мэндэлсэн өдөр мину” нэртэй бие даасан тоглолтоо хийхээр болсон. Тэрээр өнөөдөр энэхүү тоглолтынхоо талаар сэтгүүлчдэд мэдээлэл хийлээ.

С.Жавхлангийн төрсөн өдөр энэ сарын 21-нд тохиож байгаа бөгөөд түүний тоглолт энэ сарын  21, 23, 24-ны өдрүүдэд 19.00 цагт Бөхийн өргөөнд болох юм.

Үндсэрхэг үзлээ уран бүтээл, үзэл санаа, хувийн амьдралдаа дээдэлж явдаг дуучин тоглолтод хүрэлцэн ирэхдээ үзэгч олон монгол дээлээ өмсвөл хамгийн том "бэлэг" болно гэдгийг хэлээд амьсан.

Дашрамд дуулгахад, төрсөн өдрийнхөө буюу энэ сарын 21-ний тоглолтынхоо орлогыг бяцхан охинд хандивлахаар болсноо өнөөдрийн хэвлэлийн бага хурлын үеэрээ онцоллоо.  Тодруулбал,  Увс аймгийн Цагаанхайрхан сумын Хунт нуур багт өнгөрсөн сарын 23-нд нэг айлын хоёр бяцхан охин осгосон харамсалтай хэрэг гарсан.  Одоогоор гурван настай охины биеийн байдал нь хүндхэн байгаа юм. Тиймээс С.Жавхлан Монгол хүний нэгэндээ сэтгэлийн дэм хайрладаг сайхан зангаар бяцхан охинд туслахаар болжээ.