МХЕГ-ын даргын үүргийг түр орлон гүйцэтгэгч Д.Батмөнх, Уул уурхайн яамны Төрийн нарийн бичгийн дарга Р.Жигжид нар 2014 онд геологи, уул уурхай, эрчим хүчний салбарт хамтран ажиллах санамж бичиг үзэглэлээ. Гарын үсэг зурах ёслолын ажиллагаанд, Уул уурхайн яамны Хяналт-шинжилгээ, үнэлгээ, дотоод аудитын газрын дарга Д.Жавхланболд  МХЕГ-ын Дэд бүтцийн хяналтын газрын дарга Д.Жаргал, Байгаль орчин, аялал жуулчлал, геологи уул уурхайн хяналтын газрын дарга Н.Батбаяр нар оролцов. Өнгөрсөн сард  төрөөс эрдэс баялагын салбарт баримтлах бодлого батлагдсан. Үүний хүрээнд Уул уурхайн яам, МХЕГ 2014 онд дараах чиглэлээр хамтран ажиллахаар болов.

Геологи уул уурхай, газрын тосны салбарт хамтарсан шалгалт хийх

Мэргэжил  дээшлүүлэх сургалт зохион байгуулах

Холбогдох хууль эрх зүйн орчныг сайжруулах

Хууль тогтоомж, стандарт, дүрэм журам сурталчлах зэрэг 4 чиглэлээр хамтран ажиллах юм.

Уул уурхайн салбар Монгол Улсын эдийн засагт голлох нөлөө үзүүлэх болсон энэ үед гадаадын болон дотоодын хөрөнгө оруулалтаар техник технологийн шинэчлэл, үйлдвэрлэн гаргаж байгаа бүтээгдэхүүний нэр төрөл, хэмжээ өөрчлөгдөх болсон. Тэдгээрт  тохирсон хяналт шалгалтыг чанарын өндөр түвшинд тавих шаардлага тулгарч байгааг УУЯ-ны Төрийн нарийн бичгийн дарга Р.Жигжид онцлов.

Хамтын ажиллагааныхаа үндсэн дээр аль болох эрсдэл багатай, байгаль орчинд ээлтэй уул уурхайг төлөвшүүлэх, эрсдэлд суурилсан механизмийг бий болгож ажиллах төлөвлөгөөгөө баталж ажиллана. Эрсдэлд суурилсан хяналт шалгалтыг хийхийн зэрэгцээ Хөдөлмөрийн аюулгүй байдлыг хангуулах тал дээр онцгой анхаарах, нөгөө талаар байгаль орчинд ээлтэй ашигт малтмалын олборлолтыг дэмжиж, эрсдэл өндөртэй салбар дээр онцгой анхаарч ажиллана гэдгийг МХЕГ-ын даргын үүргийг түр орлон гүйцэтгэгч Д.Батмөнх хэлсэн юм.