Тэргүүний тохижилттой, жагсаалч анги шалгаруулах, иргэн-цэргийн харилцааг бэхжүүлэх зорилгоор хоёр дахь жилдээ зохион байгуулж буй “Монгол цэргийн жавхаа уралдаан”-ыг өнөөдөр албан ёсоор зарлах гэж байна.

Уралдааныг зарлах ёслол өнөөдөр 14.00 цагаас Батлан хамгаалахын  их сургуулийн Соёлын төвд  болох бөгөөд үйл ажиллагаанд хотын дарга Э.Бат-Үүл болон нийслэлийн цэргийн хүрээний бүх анги, байгууллагууд оролцоно.

Өнгөрсөн онд нийслэлийн Засаг даргын санаачилгаар анх удаа цэргийн болон цэргийн өмнөх насны залуучуудад эх орноороо бахархах, эх оронч үзэл хүмүүжлийг төлөвшүүлэх зорилгоор нийслэлд байрлах анги, нэгтгэлүүдийн дунд тэргүүний жагсаалч хамт олныг шалгаруулах ”Монгол цэргийн жавхаа’’ уралдааныг зохион байгуулж, эхний гурван байрт орсон жагсаалч хамт олныг мөнгөн шагнал, байраар шагнаж урамшуулсан юм.

Харин энэ жилийн хувьд  цэргийн алба хаагчдын ажиллаж амьдрах орчин нөхцөлийг сайжруулан, эрүүл аюулгүй байдлыг бүрдүүлэх зорилгоор уралдаанд оролцох анги нэгтгэлүүдийн тохижилтыг уралдааны нэг шалгуур болгож байгаа юм байна. Монгол цэргийн сүр хүчийг харуулсан энэхүү уралдааныг нийслэлээс жил бүр уламжлал болгон зохион байгуулж,  уралдаанаар дамжуулан цэргийн албан хаагчдын нийгмийн байдлыг сайжруулахаар төлөвлөжээ.