Хэдхэн хоногийн өмнө Хотын дарга Э.Бат-Үүл "Хариуцлагагүй компаниудтай дахин хамтарч ажиллахгүй" гэсэн лүндэн буулгасан билээ.

Дээрх лүндэн хаанаас улбаатайг өгүүлбэл Хан-Уул дүүргийн 15-р хорооны нутаг дэвсгэр дэх “UB Town” хотхоны бохир ус нь халиад нэг сарын нүүр үзжээ.

Учир явдлыг эхнээс нь тайлбал UB town хотхоныг "Өндөр буянт" гэх компани барьжээ.  Тэд хотхоныг анх барихдаа хоногт 2700м3 ус хэрэглэхээр нэгдсэн техникийн нөхцөл авсан ч үүнийгээ зөрчиж 5-15 давхар 30 ш орон сууцны барилгууд сүндэрлүүлсэн байна. Ийнхүү усны хэрэглээ нь 2-3 дахин нэмэгдсэн боловч шугам сүлжээ, насос станцыг өргөтгөж шинэчлээгүй байна. Ийм байтал хотхоныг Улсын комисс хүлээж авсан байгаа юм.

Харин шугам сүлжээг нь 2008-2009 онд "Боорчи" гэх компани хийсэн. Тэд зориулалтын бус хуванцар хоолойг суурилуулчихаад шороогоор булаад орхичихож. Үүнийг нь хоёр жилийн өмнө МХЕГ-ынхан илрүүлсэн ч ямар нэгэн арга хэмжээ аваагүй бөгөөд сарын өмнө бохирын хоолой нь хагарсан байна.

"Өндөр буянт" холдингийнхон техникийн нөхцөлөө зөрчсөн нь анхнаасаа л ашиг хонжоо харсан үйлдэл болсон. Хэрэглээ тооцоолсноос хэд дахин их юм чинь хуванцар битгий хэл сайн чанарын шугам сүлжээ ч доголдох нь цаг хугацааны асуудал байсан биз.

Тус компанийн захирал бол өнгөрсөн сонгуульд МАН-аас Өвөрхангай аймагт нэр дэвшин иргэд сонгогчдод “Чокопай” тарааж паянгаа тарьсан Н.Төмөрхүү. Энэ хүний болоод компанийх муу муухайн тоочвол хэдэн нүүр дүүрэх тул энд бичихийг болъё.

Нүглийн нүдийг гурилаар хуурч хуванцар шугам сүлжээ тавьсан дараагийн гэмтэн бол М.Нямжав захиралтай "Боорчи" ХХК. Энэ компаний тухай судалж үзэхэд ажилаа чанаргүй гүйцэтгэсэн, орчин тойрноо эвдэлж сүйтгэчихээд сэргээн засварлалт хийгээгүй гэх мэт олон зөрчил илэрч байжээ.

Дээрх компаниуд хууль зөрчсөн байхад ХЯНАЛТ хаачив аа?  Улсын комисс нөхцөлөө хэтрүүлсэн барилгуудыг хүлээж авсан. Нийслэлийн Хөрөнгө оруулалтын газар шугам хоолойг тавих ажилд нь хяналт тавьж ажилласан гэх мөртлөө тэр нь зориулалтын бус.

Нөгөөтэйгүүр "Өндөр буянт", "Боорчи" гэх компаниуд Улсын комисс, Нийслэлийн хөрөнгө оруулалтын газрын мэргэжилтнүүдийг хуурч дөнгөсөн нь бас л сонин. Магадгүй энд өнөөх л авилга хээл хахууль, танил тал нь нөлөөлөө юм болов уу?

Нийслэлийн удирдлагууд зориулалтын бус шугам сүлжээ тавьсан "Боорчи" компанитай дахин хамтарч ажиллахгүй гэсэн бол мөнөөх хариуцлагагүй мэргэжилтнүүдийг нийтэд зарлана шүү хэмээн айлгаад авна лээ. Ний нуугүй хэлэхэд энэ бол тэдэнд багадсан шийтгэл. Хэл амтай Нийслэлийн ажлыг дахиад хийхгүй болсондоо "Боорчи"-ийнхон баярлаж, сануулга авсан мэргэжилтнүүд зүв зүгээр ажилаа хийгээд л, энэ бүхний эхлэл болсон "Өндөр буянт" ямар ч хариуцлага хүлээхгүй өнгөрлөө дөө.