Говь-Алтай аймгийн прокурорын газраас санаачлан аймгийн хуулийн байгууллагуудын хамтарсан зөвлөгөөнийг зохион байгуулсан байна.

 Хамтарсан зөвлөгөөнд аймгийн Сум дундын 5-р шүүх, Прокурорын газар, ЗДТГ-ын Хууль зүйн хэлтэс, Цагдаагийн хэлтэс, Шүүхийн шийдвэр гүйцэтгэх алба, Шүүхийн шинжилгээний алба, Өмгөөлөгчдийн зөвлөл зэрэг 7 байгууллагын 62 албан хаагчид оролцжээ.

  Зөвлөгөөнд аймгийн прокурор, Хууль цаазын итгэмжит зөвлөх Н.Ганбаатар “Аймгийн хуулийн байгууллагын хамтарсан зөвлөгөөний зорилго, үр дүн, Улсын Ерөнхий Прокурорын газар болон аймгийн прокурорын газраас 2014 онд баримтлах бодлого, хуулийн байгууллагын хамтын ажиллагааг өргөжүүлэх нь” сэдвээр, бусад байгууллагын удирдлагууд 2013 онд  хийсэн ажил, бодлого, зорилт, анхаарах асуудлын талаар тус тус мэдээлэл хийсэн байна.

 Мөн аймгийн ИТХ, ГХУСАЗЗ-ийн дарга А.Дэлгэржаргал, аймгийн Засаг даргын орлогч Д.Батсайхан нар урилгаар оролцож ИТХ, ГХУСАЗЗ, Засаг даргын тамгын газрын зүгээс хуулийн байгууллагууд хамтран ажиллах чиглэл, бодлого, зорилтын талаар илтгэл, мэдээлэл тавьж 2014 онд хамтарч ажиллах зорилтоо тодорхойлжээ.

 Аймгийн прокурорын газраас хуулийн байгууллагуудын хамтарсан зөвлөгөөнийг санаачлан зохион байгуулсан зорилго нь Улсын Ерөнхий Прокурорын баталсан “Прокурорын байгууллагын үйл ажиллагааг олон нийтэд хүргэх, гэмт хэргээс урьдчилан сэргийлэх ажлыг эрчимжүүлэх” зорилтын хүрээнд хуулийн байгууллагуудтай хамтарч ажиллах, хуулийн байгууллагуудын хамтын ажиллагааг сайжруулах, Мөрдөн шалгах, ял эдлүүлэх ажиллагаанд хяналт тавих чиглэлээр мөрдөгдөж байгаа хууль, журмын хэрэгжилт, нийтлэг гарч байгаа зөрчил, тулгамдаж байгаа болон цаашид анхаарах асуудлыг тодорхойлоход чиглэсэн байна.

Зөвлөгөөний эцэст илтгэл мэдээлэлд дурьдагдсан, хуулийг хэрэгжүүлэх чиглэлээр анхаарах болон шийдвэрлэх асуудлын талаар зөвлөмж гаргаж баталсан байна.

Мөн хамтарсан зөвлөгөөний хүрээнд хуулийн байгууллагуудын албан хаагчдын чөлөөт цагийг зөв боловсон өнгөрүүлэх зорилгоор сагсан бөмбөгийн тэмцээн зохион байгуулж аймгийн Шүүхийн шийдвэр гүйцэтгэх алба 1-р байр, Цагдаагийн хэлтэс 2-р байр, Сум дундын 5-р шүүх 3-р байр тус тус эзэлж амжилттай оролцсон байна.