“Харанга” хамтлагийн “Үгүйлэн санана” дууг БНХАУ-ын дуучин Лао Ву дуулж дүрсжүүлсэн талаар бид өмнө мэдээлсэн. Энэ жил 50 нас хүрч буй Лао Ву энэ дууг "Чамайг санана" нэртэйгээр дуулсан бөгөөд үг, аяыг нь өөрөө зохиосон гэжээ.

Тэгвэл Харанга хамтлагийн ахлагч Ц.Чулуунбаатар энэ талаар "Надаас ямар ч зөвшөөрөл аваагүйгээр хөгжмийг өөрөө зохиосон гэсэн нь ноцтой байна. Хятадын уран бүтээлчид Оюуний өмчийн хууль зөрчсөн анхны үйлдэл энэ биш юм. Өмнө нь бас зөвшөөрөл авалгүйгээр "Зөвхөн Монголдоо" дууг Макаогийн олимпод хятад хэлээр дуулж байсан. Би энэ дууны хөгжмийг 1985 оны 10 дугаар сарын 15-нд бичсэн... Монгол улс олон улсын конвенцэд нэгдсэн. Тиймээс иргэнийх нь эрх дэлхийн нөгөө өнцөгт зөрчигдөж байсан ч хамгаалах үүрэгтэй. Лао Вуг зохиогчийн эрхийг ноцтой зөрчиж, уран бүтээлд зөвшөөрөлгүй халдсан гэдэг үндэслэлээр судалж гомдол гаргах бодолтой байна" хэмээн байр сууриа илэрхийлжээ. 

Ингээд “Үгүйлэн санана даа” дууг хятад дуучин хэрхэн дуулсныг хүргье.