Манай улсад элэгний өвчлөл газар авч байгаа энэ үед олон хүн Энэтхэгт элэг шилжүүлэн суулгах мэс заслыг амжилттай хийлгээд иржээ. Тэгвэл 30 гаруй хүний амийг аварсан Энэтхэг Улсын Дели хотын “Фортиз” эмнэлгийн элэг шилжүүлэн суулгах тасгийн захирал Вивек Виж гурав дахь удаагаа Монголд хүрэлцэн ирээд байна. Тэрээр элэг шилжүүлэн суулгах мэс засал хийлгэсэн өвчтөнүүдээ гурван сар тутамд эргэн ирж, үзлэг оношлогоо хийж зөвлөгөө өгдөг уламжлалтай. Харин эмч Вивек Виж энэ удаад элэгний ямар нэг асуудалтай иргэдийг энэ сарын 19-24 хүртэл хүлээн авч, үнэ төлбөргүй үзлэг оношлогоо хийж зөвлөгөө өгөхөөр болжээ.

  Эмч Вивек Виж өнгөрсөн хугацаанд хүүхдийн болон том хүний элэг шилжүүлэн суулгах, элэг, цөстэй холбоотой 1000 гаруй мэс заслыг амжилттай  хийсэн байна. Мөн тэрээр улсдаа элэг шилжүүлэн суулгах мэс заслын анхны мэргэжилтнүүдийн нэг бөгөөд түүний удирсан багийнхны  хийсэн мэс ажилбарууд нь дэлхийд энэ төрлийн үйлчилгээ үзүүлдэг эмнэлгүүдээс хамгийн шилдэгт тооцогддог аж.

  Дашрамд дурдахад, тус эмнэлэгт хандсан хүмүүс хагалгаанд орохоосоо өмнө Энэтхэг дэх Монголын Элчин сайдын яаманд албан ёсоор бүртгүүлэх ёстой юм байна. Үүний зэрэгцээ Энэтхэг дэх манай Элчин сайд С.Баяр болон түүний гэр бүл, ЭСЯ-ны ажилтнууд өвчтөн тус бүрт анхаарал хандуулдагт өвчтөний ар гэрийнхэн талархаж явдаг ажээ. Эх орондоо эргэн ирсэн өвчтөн болон доноруудын эрүүл мэндийн байдалд Улсын клиникийн I эмнэлгийн эмч О.Сэргэлэн ахлагчтай “Элэг шилжүүлэн суулгах” мэс заслын баг дээрх эмнэлэгтэй хамтарч хяналт тавьдаг юм байна. Хэрвээ та эмч Вивек Вижид үзүүлж зөвлөгөө авахыг хүсвэл 99110045 88002203 утсаар холбоо барьж болох аж.