Хаврын хайлган цагаар турах хүслэнгүүд олширдог. Мэдээж шүү дээ. Зуныг гоолиг сайхан биетэйгээр угтахыг хүсэхгүй хэн байхав. Шилдэг сайн гэсэн тодотголтой турах дэглэм зөвлөгөөнүүд олширсон энэ үед  тэдгээрийн сөрөг үр дагаварыг мэддэг байх нь чухал юм. Ингээд 24tsag.mn сайт зарим турах аргуудын сөрөг үр дагаваруудыг танилцуулж байна.

Огцом турах нь гоо сайхан эрүүл мэндээ алдах шалтгаан болдог

Бүсгүйчүүд төрсөн өдөр, хурим, шинэ жилийн үдэшлэг гэх мэтийн онцгой өдөрт зориулан энэ дэглэмийг сонгодог. Богино хугацаанд эрчимтэй жин хаях шаардлагатай байдаг учраас хэт их ачааллын зэрэгцээ маш бага хэмжээний илчлэгтэй хооллох "шалгарсан" арга. Тухайлбал, өглөөний цайнд нэг ширхэг чанасан өндөг, оройн хоолны тавган дээр 100 гр бараан мах эсвэл жигнэсэн ногоо байх жишээтэй.  Үүний үр дүнд багахан хугацаанд боломжийн жин хаях ч гэлээ үүнтэй зэрэгцэн эрүүл мэнд, гоо сайхнаа алдаж байдгаа тэр бүр мэддэггүй. Дэглэм барьсны үр дүнд хасагдсан жингийн багахан хувь нь илүүдэл өөх тос, харин ихэнх нь бие мах бодийг тэжээж, хэвийн үйл ажиллагааг нь хангаж байдаг бодисууд байдаг. Үдэшлэгт гоолиг биетэй харагдах гэж огцом тураах дэглэм барьсны үр дүнд ядарч, толгой өвдөн, ялихгүй юманд цухал хөдлөн, бүхнээс залхсан эрч хүчгүй нэгэн болж очих нь элбэг. Сайхан үдэшлэг дээр хөгжилдсөн ч юмгүй ядарч, сульдсан амьтан бушуухан гэртээ харьж амрахыг хүсэх нь лавтай.  Нэгэнт товлосон өдөр өнгөрсөн учраас сайхан хооллох хүсэл өөрийн эрхгүй төрнө. Энэ үед хоолны дуршил огцом нэмэгдэж, өлсөж, ундаассан эд эсийнхээ заавраар их хэмжээгээр идснээс болж огцом таргална. Ингэснээр богино хугацаанд жин хасах дэглэм эсрэгээрээ огцом жин нэмэх эрсдэл дагуулдаг.

Нэг төрлийн хүнсээр дагнах нь уураг амин дэмийн дутагдалд оруулна

Янз бүрийн хүнсийг хольж идэх нь идэх дур хүслийг өдөөдөг. Харин яг үүний эсрэг аль болох илчлэг багатай, амин дэмээр баялаг өндөг, жимс, тараг, самар, хүнсний ногоо, бүхэл үр гээд дурын хүнс сонгон тодорхой хугацааны турш ганцхан тэрийг л иднэ. Эсвэл мах, шоколад ч сонгосон болно. Үүнийгээ буцалсан ус, ногоон цайгаар даруулна. Аль, аль нь хэмжээний хувьд хязгааргүй.  Ингэснээр хоолны дуршил буурч, долоо хоногт 3-10 кг жин хасах нь бий.  Харин сөрөг тал нь гэвэл бие мах бодь давс, чихэр, уураг, эрдсийн дутагдалд ордог.  Алимны дэглэм барих үед ходоодны хүчил ихсэж, үүнээс үүдэн хоол боловсруулах эрхтэн систем хямарч, ходоодны шарх, бүдүүн гэдэсний үрэвслийн үүсэх нь бий. Тарвасны дэглэм бөөрний чулуутай болгох магадлалтай. Энэ мэтээр нэг төрлийн хүнсний бүтээгдэхүүнээр дагнаснаар бусад төрлийн хоол хүнснээс авдаг эрдэс бодис дутагдана. Үүнээс болж бодисын солилцоо тодорхой хугацаанд өөрчлөгдөн ямар нэг өвчин үүсэх эрсдэлтэй.

Нүүрс уснаас татгалзахыг анагаах ухаан сайшаадаггүй

Нүүрс усаар баялаг хүнснээс татгалзаж, мах ногоо түлхүү хэрэглэх ёстой. Хагас сард 10 кг жин хаях магадлалтай эл дэглэмийн гол зарчим нь гурил, будаа, төмс, сахар зэрэг нүүрс усаар баялаг хоол хүнснээс татгалзах юм. Хүний бие нүүрс уснаас энерги ялгаруулан зарцуулдаг бөгөөд нүүрс усаар гачигдсан тохиолдолд хуримтлуулсан өөхөө задалж эхлэн жин хасдаг байна. Хүн өдөрт 260 гр нүүрс ус хэрэглэдэг бол энэ дэглэмээр хоногт 20 гр-аас эхлэн бага багаар нэмсээр 60-90 гр болгон, үүнийгээ насан туршдаа баримтлах шаардлагатай. Холливудын оддоос энгийн гэрийн эзэгтэй хүртэл сая сая шүтэн бишрэгчтэй, өлсөхгүй, хүссэнээрээ идэж турах энэ дэглэмийг анагаах ухаан сайшаадаггүй. Дээрх бодисын солилцооны өөрчлөлтөөр өөх задарч турах хэдий ч толгой өвдөх, бөөлжих, царай цонхийхоос эхлэн бөөрний дутагдалд орох хүртэл сөрөг үр дагавар гарах магадлалтай.

Өөх тосыг тохируулж хэрэглэх нь чухал

Махны өөх төдийгүй тослог ихтэй сүү, цагаан идээ, цөцгийн тос, зарим төрлийн загас, самар гээд тослог өндөртэй бүхнээс эрс татгалздаг. Долоо хоногийн дэглэм баримтласны үр дүнд гурав хүртэл кг хасах боломжтой.  Гэхдээ өөх тос гэдэг тэр чигтээ илүүдэл байдаггүй. Судас хатуурлаас сэргийлэх липопротейн, Омега-3, Омега-6 болон А, D, Е, К амин дэмийг зөвхөн тослог ихтэй хоол хүнснээс авдаг. Эсийн бүрхүүлийн чухал бүрэлдэхүүн нь тос, хүүхдийн тархи, мэдрэлийн эс, ясны бүтэцэд чухал найрлагаас татгалзаж байгаа хэрэг. 

Өвчин хууч олонтой болох гээгүй л бол амттан идэж турах тухай санахын ч хэрэггүй

Өөр нэг хувилбар бол амттан идэж турах, яг л үлгэр шиг сонсогдож байгаа биз. Энэ аргыг бүсгүйчүүд төдийгүй эрчүүд таашаадаг. Өсвөр насныхан бол бүр ч дуртай. Өдөржингөө шоколад л иднэ, эсвэл зайрмаг. Үүний үр дүнд өдөрт 500 ккал илчлэг авна. Гэхдээ амттанд тослог, нүүрс ус байх хэдий ч амин дэм, эслэг чанар байхгүй.  Үр дүнд нь арван хоногийн өмнө хоёр размераар багадуулж авсан жинс яг таарна. Харин сөрөг тал нь цусан дахь чихэр ихсэж, нойр булчирхай инсулинийг их хэмжээгээр ялгаруулна. Инсулин нь цусан дахь чихрийг хөөж нойр булчирхайг хараа хяналтгүй өсгөдөг. Үүнээс болж чихрийн дутагдалд орж анхаарал сулран оюун ухаан зогсонги байдалд орж сүйрэх аюултай. Мөн ходоодны хүчил ихсэх, амин дэмийн дутагдалд орох, хоолны дуршил буурах өвчтэй болох мэдээж шүд өвчлүүлэх гээд уртаас урт жагсаалт бичиж болно.