Өнөөдөр "Монголын эдийн засгийн чуулган 2014" Төрийн ордноо болж байна.

Тус чуулганд Ерөнхий сайд Н.Алтанхуягаас эхлээд улс төр, эдийн засгийн салбарт нэр нөлөө бүхий олон хүн оролцож Монголын эдийн засгийн өнөөгийн болоод цаашдын чиг хандлагын талаар санаа бодлоо солилцож байгаа юм. Гадны зочид төлөөлөгчид ч их байна. Харин нэг л хүн дутуу санагдаад болдоггүй. Тэр нь Эдийн засгийн хөгжлийн сайд Н.Батбаяр.  Уг нь улс орны амин чухал асуудлыг хэлэлцэж байхад салбарын сайд нь байлцах нь чухал хэрэгтэй. Гэтэл тэрбээр усанд хаясан чулуу шиг нам жим байна. Харин түүнийг хайсан сэтгүүлчид л олон байх шив. Ер нь Н.Батбаяр сайд сүүлийн үед сэтгүүлчдээс зугатаж, олон нийтэд мэдээлэл хийхээс татгалздаг зуршилтай болсон. Угтаа бол бодит байдлаа үнэнээр нь хэлээд ямар арга хэмжээ авч ажиллаж байгаагаа ярьчих нь сайд хүний л хийх ажил. Тэр тусмаа "Эдийн засгийн форум" гэх мэт чухал уулзалт, чуулганд оролцож байх нь салбар хариуцсан сайдынх нь үүрэг байлтай.

Гэтэл тэр хариуцлагаас мултарч, зугатаахыг чухалчилж байгаа бололтой. Аль эсвэл улсын эдийн засгийг доройтуулснаа хүлээн зөвшөөрч ичсэндээ олны өмнө гаралгүй нуугтаж амьдрахаар шийдсэн үү.

Цөөнхийн бүлгээс өмнө нь улсын эдийн засгийг хүнд байдалд оруулсан гэх үндэслэлээр Сангийн сайд Ч.Улаан, Эдийн засгийн хөгжлийн сайд Н.Батбаяр нарыг албан тушаалаас нь огцруулах асуудлыг УИХ-д оруулж хэлэлцүүлсэн удаатай. Харин Ерөнхий сайд “Манай Шинэчлэлийн Засгийн газрын гол ачаа үүрч яваа сайдууд. Хийсэн ажилтай хүмүүс шүү” хэмээн өмөөрч улмаар УИХ дахь УИХ дахь МАХН-МҮАН-ын “Шударга ёс” эвслийн бүлэгтэй хуйвалдаж хоёр сайдыг авч үлдсэний гор өнөөдөр ийн гарч байна.