Дөнгөж сая МУГЖ дуучин С.Жавхлан улс төрийн асуудалд дээл гэдэг үгийг оруулж үндэснийхээ дээлийг гутаан доромжилсныг эсэргүүцэж мэдээлэл хийлээ.

Уг нь тэрээр хөдөө орон нутгуудаар аялан тоглолт хийж явсан бөгөөд үндэснийхээ дээл хувцсыг гутаан доромжилсон үйлдлүүдийг харж тэсэхээ болиод ирсэн гэв.

Тэрээр энэ үеэр "Энэ ямар хууль батлагдах гэж байгаа нь хамаа алга. Хаврын хаварт нэгнийгээ гарахаар татаад унагадаг. Ийм юманд Монголчууд дасчихсан. Харин энэ хүмүүсийг наль шаль хэрүүлээ хийгээд явж байх хооронд бор зүрхээрээ Монголын ард түмэн ачааны хүндийг үүрээд явж байна. Ийм зүйлд яагаад дээл гэдэг үгийг оруулав? Үүнд дээл ямар хамаа байна? Нэг хэсэг нь өвөг дээдсийнхээ юмыг өмсүүлэхийн төлөө яваад байдаг, нөгөө хэсэг нь тайлуулах тухай яриад яваад байж болохгүй. Тэр хууль нь батлагдана уу? Хэн нь огцорно уу? Хэнтэйгээ яаж хэрэлдэнэ үү? тэдний хэрэг тэндээ л юм байгаа биз. Энэ хүмүүсийн хэрүүл уруул бол надад ямар ч хамаагүй. Хамгийн гол нь Монголын алтан ургийн 37 хаан өмсөөд ирсэн, дэлхий биднийг хараад "Энэ хүмүүс Монголчууд байна" гэж хэлэх энэ сайхан өв соёлоо ийм муухай хэрүүлд оролцуулж байгааг хараад би харамсч байна. Дан ажил давхар ажил гээд хэлчихгүй яасан юм. МАН-ын нөхдүүд тэр жагсаалынхаа үеэр яасан муухай дээл өмсөв өө? Наадмаар энэ хүмүүс нээх ганган хүмүүс явдаг шүү дээ. Энэ хүмүүст маш ганган дээлнүүд байдаг л байлгүй дээ. Монголын үндэсний өв соёлыг ингэж гутаан доромжилсныхоо төлөө энэ хүмүүс уучлал гуйх ёстой" гэсэн юм.

Эцэст нь С.Жавхлан энэ улсад дээл хувцсаа өмсдөг, дээдэлдэг хүмүүс байдаг гэдгийг харуулахаар маргааш өглөөний 09.00 цагт Чингисийн талбайд өдөрлөг зохион байгуулахаар болсноо дуулгаад Монголын ард түмнийг дээлээ өмсөн цуглахыг уриаллаа.