МАН энэ сарын 10-нд давхар дээлийг тайлуулах эсэргүүцлийн жагсаал зохион байгуулсан билээ. Тэд энэ үеэрээ “Монгол өрх бүрт нэг архичин, нэг биеэ үнэлэгч байна”, “Залуусын 40 хувь нь хар тамхичид байна” гэх мэтээр хариуцлагагүй үгс унагасан бөгөөд түүнийг нь эсэргүүцсэн иргэд өчигдөр МАН-ын байрны гадаа жагсаж уучлал гуйхыг шаардсан  юм.

Тэгвэл МАН-ын жагсаал оролцож  "Өнөөдөр айл бүхэнд нэг архичин, нэг биеэ үнэлэгч, бөө удгантай болжээ" гэх үгийг хэлсэн Шударга иргэдийн фронтын тэргүүн Г. Арслан үгийг нь эсэргүүцсэн хүмүүст хандан мэдэгдэл гаргажээ.

Тэрээр мэдэгдэлдээ "Миний хэлсэн үгийг эсэргүүцэн жагсаал зохион байгуулсан, эрх баригчдын "Бөгс долоогч"-доо та бүгд Шударга иргэдийн фронтын төв оффисийн  гадна ирж эсэргүүцлийн цуглаанаа хийнэ үү? Би гарч ирж та бүгдтэй уулзаж учрыг тайлбарлах болно. Жич: Манай оффис Сүхбаатарын хөшөөний урд "төв" цэг дээр байгаа. Уулзах цагаа урьдчилан мэдэгдэхийг хүсье"  гэсэн байна.

Өчигдөр болсон жагсаалыг эргэн сануулбал жагсагчид МАН-ын байрны урд “Бид янхан гэж үү”, “Бид архичин гэж үү”, “Бид хар тамхичин гэж үү”, “Бид янхан биш”, “Бид шаардаж байна” гэх мэт үгсийг бичсэн цаасыг барьж, дуугүй жагсаал хийсэн бөгөөд жагсаалд ирсэн залуусаас гарын үсэг цуглуулж, МАН-ын даргад хүргүүлнэ гэж байсан юм.