Монгол Улсад орчин цагийн музей үүсч хөгжсөний 90 жилийн ойн хүрээнд зохиогдож байгаа ажлын нэг нь Музей судлалын олон улсын хурал юм. Олон улсын музейн зөвлөл, ССАЖЯ-ны дэмжлэгтэй Монголын Үндэсний музей, ОХУ-ын Алтайн Бүгд Найрамдах улсын Багшийн Академи, Монгол улсын Шинжлэх Ухааны Академи, Монголын Эрдэм дэлгэрүүлэх нийгэмлэг, Олон улсын музейн зөвлөлийн Монголын Үндэсний хороо хамтран зохион байгуулж буй тус хурал Улаанбаатар хотноо өнөөдөр, маргааш хуралдана.Бүгд Найрамдах Казахстан улсын Павлодар хотоос гараагаа эхлэсэн хурлын тавдугаар шат Монгол Улсад “Музей ба Соёлын өв: туршлага, шинэчлэл” сэдвийн хүрээнд болох юм. Хуралд ХБНГУ-ын Мюнхен хотын Олон улсын философийн сургуулийн доктор, профессор Виерег Хилдегард “Дэлхийн өв ба боловсрол”, Тайваний Үндэсний Урлагийн Их сургуулийн доктор, профессор Чен Куо-нинг “Соёлын өв, музей, аялал жуулчлал", ОХУ-ын Алтайн Бүгд Найрамдах Улсын Багшийн Академийн Түүх-соёлын өв, аялал жуулчлалын тэнхимийн эрхлэгч Труевцева Ольга “Соёлын өвийг судлах шинжлэх ухааны хандлагууд” зэрэг сонирхолтой илтгэлүүд хэлэлцүүлэх ажээ.
Монгол, ОХУ, ХБНГУ, Тайвань, Казахстан зэрэг орнуудын музей судлаач, түүхч, урлаг судлаач зэрэг 60 гаруй мэргэжилтэн оролцож Ази номхон далайн орнууд соёлын өвөө хадгалаж хамгаалахын зэрэгцээ соёлын аялал жуулчлалын бүтээгдэхүүн болгох, мөн бүс нутагт байгаль, түүх-соёлын өвийг хамгаалахаар шинээр хийгдэж буй ажлын туршлагаас хуваалцана.
