Дуу хуураар алдартай Дундговийн дуучин бүсгүй Э.Оюумааг "хардсан" харчуул баахан ээрч ярьдаг. Тэгвэл хонин нүдэт дуучин бүсгүйг хартай харчуулаас өмөөрсөн 24tsag.mn-ий "Фэйслүүк" булан түүний фото цомгийг амьдарлын хуудсуудтай нь дэлгэж байна.

Хонин нүдэн: Э.Оюумаа бол дөрвөн хүүхэдтэй айлын бага. Дуучдын нутаг Дундговьд төрсөн болохоор багаасаа л хонины бэлчээр, адууны зэлээр нэг хангинуулан дуулдаг байж. Гэхдээ тэр бас урлагийн гэр бүлийн хүн. Циркчин өвөө, аавын хамт хонин нүдэн Оюумаа. Түүний хоёр эгч нь багш мэргэжилтэй бол ах нь аймагтаа мал маллан амьдарч буй. Ээж нь “Бадамлянхуа” хүүхдийн асрамжийн төвд зөвлөх  хийж, 36 дахь жилдээ багшилж байгаа аж.

Өвлүүлсэн өвөө: "Алиа" хэмээн өргөмжлөгдсөн циркийн жүжигчин Ж.Данзан гуай бол түүний эрхэлж өссөн өвөө. Аав нь ч мөн цирктэй амьдарлаа холбосон алиалагч, акробатч Д.Энх-Амгалан юм.  Э.Оюумаа өвөө, аавынхаа мэргэжлийг эзэмшээгүй ч хожим "өвлүүлсэн" циркийн тайзан дээр нь "Амрагхан чамдаа" нэртэй тоглолтоо хийсэн юм.
Таван жил: Нийтийн хос дуучид "бужигнуулж" байсан 2003 оноос хойш тэд олон жил хамт дуулж, таван жил нэг гэрт амьдарсан. Эхнэртэй хүнийг гэр бүлээс нь салгалаа гэх хэл ам энэ жилүүдэд тойрсонгүй. "Би өөрөө эмэгтэй хүн. Хэзээ нэгэн цагт би өөрөө хүүхэдтэй болно. Тэр үед миний хүүхэд аавгүй байвал би яах вэ гэж удаан бодсон. Аливаа зүйлийг өөр дээрээ жишиж үзэж шийдвэр гарга гэдэг дээ.  Хэдийгээр бид хоёр бие биедээ хайртай байсан ч гэсэн эцсийн эцэст хоёр хүүхдийнх нь ирээдүйг бодсон. Тэгээд л Ээнээ бид хоёр ярилцаад хоёр тийшээ болохоор шийдсэн. Бидэнд өөрсдийн жаргалаас илүү Ээнээгийн  хоёр хүүхдийн ирээдүй илүү үнэтэй байсан" гэх үгтэйгээр дуучин бүсгүйн амьдрал үргэлжилж байна.

Б.Баяр /24tsag.mn/