Байр худалдаж авах явцад иргэд зуучлагчтай холбоотой асуудалд орох тохиолдол цөөнгүй гарсаар байна. Тухайлбал, иргэн С.Энх-Амар зарын дагуу байр сонирхож, авахаар шийдсэн ч гэрээ хийх үед зуучлагч нь урьдчилж хэлээгүй төлбөр нэхэж, улмаар маргаан үүсжээ. Тэрбээр бидэнтэй холбогдож, болсон явдлынхаа талаар хуваалцлаа.
-Та хэзээ байрны зар харсан юм бэ?
-Одоогоос хоёр долоо хоногийн өмнө unegui.mn сайтаас байрны зар харсан. Хайж байсан байршилд байр гарч ирээд холбогдсон юм. Зар дээр REMAX-ийн агент Лхамжав гэдэг хүний нэр байсан. Утасны дугаар руу нь холбогдоод, очиж байраа үзсэн. Байр ч таалагдаад гэрээ хийхээ ярилцсан. Энэ Лхамжав гэдэг хүн үндсэн байрны эзэнтэй нь уулзуулахгүй долоо хоног орчим болсон. Эзэнтэй нь уулзуулахгүй бол өөр байр хайлаа, энэ байрыг болилоо гэж байж арай гэж эзэнтэй нь уулзуулсан.
-Хэзээ таны ажил дээр ирсэн юм бэ? Ирэхдээ холбоо барьсан уу?
-Байрны гэрээ, нотариат гэж явахдаа би энд ажилладаг гээд ажлын газраа хэлж байсан. Гэтэл одоогоос хэдхэн хоногийн өмнө ажил дээр мөнгө нэхээд хүрээд ирсэн. Хоёр сая төгрөг нэхсэн. Үүнээс өмнө манай эхнэр, энэ хүнтэй хамт явж нотариат орсон. Орсон ч гэж, манай эхнэрийг нотариат ороход хүрээд ирсэн юм билээ.
Тэр өдөр "эгчийнхээ данс руу хоёр сая төгрөг хийчих" гэж хэлсэн гэсэн. Яагаад гээд асуутал "би ийм гоё байрны гэрээ хийж өгч байхад хоёр сая төгрөг өгч чадахгүй ямар арчаагүй юм" гээд л эхэлсэн. Нотариатын гадаа их юм болсон л доо. Байрны эзэнд нь энэ гэрээг хийхгүй шүү, одоо цуцал гэж хүртэл хэлсэн юм билээ. Биднийг гуйлгачин гэж орилоод л, нөхөртэй чинь уулзъя гээд тэгээд миний ажил дээр ирсэн. Манай ажил дээр ирээд л урдаас хашигчиж эхэлсэн.
-Нэхсэн мөнгийг нь өгөхгүй гэсний төлөө гар хүрсэн хэрэг үү?
-Тийм ээ. Хоёр сая төгрөг өгөхгүй гэтэл намайг хоёр алгадаж, шанаадсан. Би тэр хүний биед гар ч хүрээгүй. "Цагдаа дуудсан та наанаа байж бай" гэтэл юу юугүй л яваад өгсөн.
-Байрны зар дээр жуучлалын тэдэн төгрөг гэсэн мэдээлэл байсан уу? Эсвэл тус байрыг худалдаж авъя, гэрээ хийе гээд явах тэр хугацаанд нэхээд байгаа хоёр сая төгрөгийн талаар ярьж байсан уу?
-Зар дээр жуучлалын талаар ямар ч мэдээлэл байгаагүй. Харин хамт нотариот гээд явахад миний дүү эгчийгээ бодох уу гэж хэлж байсан. Бодох уу гэдэг нь юу гэсэн үг вэ, та тойруулалгүй шулуухан л ярь гэхэд эгчдээ ганц, хоёр сая төгрөг өгчихнө биздээ гэсэн. Мөнгө төгрөг бол мэдэхгүй гээд л өнгөрөөсөн. Гэтэл мөнгө өгнө гэсэн гээд бодчихсон юм уу, мэдэхгүй. Өөрөө өөртэйгөө яриад л, мөнгө авна гээд бодчихсон байх. Байрны бүх зүйл болсны дараа гэрээ цуцална гээд л хоёр сая төгрөг нэхэж эхэлсэн.
-Агентынх нь талаар REMAX-тай холбогдсон уу?
-Холбогдсон. Энэ хүндээ арга хэмжээ авч өг, надад гомдолтой байна гэдгээ хэлсэн. Монголчууд байр авахдаа бэлэгшээж авдаг шүү дээ. Гэтэл олон жил хөдөрлөж, одоо л нэг байртай боллоо гэтэл нэг хүнд хараалгаж, зодуулсан. Бүхэл бүтэл том компани төлөөлж байгаа хүн ийм байна гэхээр гайхаж л байлаа. REMAX-ынхан бүгд ингэж ажилладаг юм уу. Бид шалгаж байна хариу өгнөө л гэсэн. Одоогоор ямар ч хариу байхгүй байна. Залгасан ч утаа авахгүй байгаа.
-Цагдаагийн байгууллагад хандсан уу?
-Цагдаагийн байгууллагад өргөдөл өгсөн. Гэмтлийн зэрэг гараагүй учраас торгуулаад л өнгөрөх байх гэсэн. Гэхдээ надад тэр нь хамаагүй. Би маш гомдолтой байна.
-Сүүлд ирснээс хойш дахин холбоо барьж, мөнгө нэхсэн үү?
-Эхнэрийн дугаар руу залгасан байна лээ. Дуудлагыг нь аваагүй. Дахиад юу гэж орилох бол гэхээс айж байна. Шинэ байр авчихлаа, байрны тоотыг хүртэл мэдэх учраас дахин яаж дарамтлахыг мэдэхгүй байна. Хүмүүс байр авахын тулд маш их хөдөлмөрлөж байгаа. Бэлэн мөнгөөр байр авдаг хүмүүс цөөхөн шүү дээ. Ихэнх нь зээлээр авч байгаа. Тийм байж дахин агент гэх хүнд хэдэн сая төгрөг өгнө гэдэг хүнд шүү дээ. Олон залуус яг ийм зүйлтэй тулгарч байгаа байх гэж бодож байна. Чимээгүй мөнгө өгөөд салдаг хүмүүс ч бий байх.
-Ярилцсанд баярлалаа.
Д.Батчулуун
