Энэ долоо хоног АТГ-аас Н.Энхбаярыг албадан саатуулсан нь нийгэмд багагүй дуулиан тариад авлаа. Учир нь түүнийг шөнийн 20.00 цагийн үед буутай этгээдүүд халдан, үүрээр гэр лүү нь дайран нэвтэрч, Төв аймгийн цагдан хорих төв рүү авч явсан явдал байв. МАХН-ын дарга Н.Энхбаяр төрийн тусгай хамгаалалтад байдаг. Тиймээс түүний амь нас, машин, эд хөрөнгө, эхнэр хүүхэд гээд тэрээр халдашгүй эрхтэй, хамгаалалтад байгаа.

   Гэтэл АТГ, цагдаагийн ажилтнууд түүний машины цонхыг хагалан, түүний биед халдан хүчээр хорьсон юм. Энэ нь ард иргэдийг ихээхэн бухимдуулаад авав. Халдашгүй дархан эрхтэй хамгаалалтад байдаг хүнийг ингэж байгаа юм чинь энгийн иргэдийг бол яаж ч мэдэхээр байна гэсэн яриа иргэдийн дунд яригдаж эхэлсэн юм.

    Түүнчлэн түүнийг халдлагад өртлөө гэх мэдээг сонсоод гэрт нь цуглаад байсан УИХ-ын гишүүдийн биед хүртэл халдсан нь томоохон сенсаци болоод байгаа. Тухайн үед түүний гэрт байсан Ч.Улаан гишүүний нүдний шилийг хагалж, Ц.Шинэбаяр гишүүний хоолойг боож, Д.Тэрбишдагва гишүүний нүүрийг хөхрүүлж, О.Чулуунбат гишүүний тархийг хөдөлгөсөн гээд хуулийн байгууллагын ажилтнууд баривчлах ажиллагааг хэтэрхий балмад хийх шиг болов.

     Хэдийгээр АТГ-аас түүнийг Эрүүгийн хуулийн 150.3-т зааснаар эрүүгийн хэрэг үүсгэн, сэжигтнээр татаж байцаалт авахаар арван удаа дуудсан ч ирээгүй учир ийнхүү албадан саатуулахаар болсон хэмээн мэдэгдсэн ч баривчлах ажиллагааг хууль бусаар явуулсан гэх шүүмжлэлийг араасаа дагуулсан.

    Мөн баривчлах л байсан юм бол эртхэн баривчилж байхгүй яагаад заавал ҮАБЗ-ын протоколыг дэлгэсний дараа баривчлах болов гээд АТГ-ын ажиллагааг шүүмжилж эхэллээ. Учир нь тэрээр баригдахынхаа өмнө Төрийн ордонд хэвлэлийн бага хурал зарлан, долдугаар сарын 1-ний үймээний дараа улс төрийн намуудын хэлэлцсэн ҮАБЗ-ын протокол бүхий 300 хуудас материалыг нийтэд дэлгэсэн юм.

    Экс Ерөнхийлөгчийг барихын төлөө хөршүүдийнх нь эд хөрөнгийг цонхоор шидлэх зэргээр эвдэн сүйтгээд зогсохгүй, хөрш айлын эздийг хар үүрээр, дан хувцастай гэрээс нь туугаад гарсан Монголын цагдаагийнхны гүйцэтгэх ажиллагааны талаар шүүмжлэл хүн бүхний яригдах сэдэв болов. Хэдийгээр иргэд Н.Энхбаярын талд орж, түүнийг зөвтгөхгүй байгаа ч хамгийн гол нь гүйцэтгэх ажиллагаа бохир заваан болсныг дахин дахин шүүмжилж байна.