Н.Энхбаярын баривчилгааны ар хударгаар Монголын ард түмнээр тохуурхсан “Саусгоби Ресурсиз” кампанийн асуудал анхаарлын гадна үлдэх гээд байна. Монголын гурван сумын хэмжээний газар нутгийг хамарсан 30 орчим лиценз эзэмшдэг энэхүү компаний дийлэнх хувийг Хятадын төрийн өмчит “Чалко” компани худалдан авахаар болсон. “Файнаншл Таймс” сонины бичиж байгаагаар  энэ компани өөрийн эзэмшлийн орд газрын дийлэнх хэсгийг Хятадын төрийн өмчит компанид зарах гэж байгаагаа Монголын Засгийн газарт албан бусаар мэдэгджээ. Харин Монголын Засгийн газар дэмжсэн байр суурийг илэрхийлсэн гэж дурдагдсан юм. Энэхүү мэдээлэл гарсны дараа хүмүүс шуугиж эхэлсэн бөгөөд Засгийн газрыг шүүмжлэх улс төрчдийн тоо нэмэгдсэн. Эвгүй байдалд орсон Засгийн газар энэ талаар байр сууриа илэрхийлэхийг “Саусгоби Ресурсиз” компаниас шаардсан сурагтай. Засгийн газрын хүсэлтийн дагуу “Саусгоби Ресурсиз” Монголын ард түмнийг басамжилсэн мэдэгдлийг англи, монгол хэлээр гаргаж хэвлэлүүдээр тараав. Мэдээж англи эхийг нь гадны хэвлэлүүдэд, хөрөнгө оруулагчиддаа зориулсан нь тодорхой юм. “Саусгоби Ресурсиз”-ийн мэдэгдэж байгаагаар бол өөрийн хувьцаагаа зарах гэж байгаагаа Монголын Засгийн газарт мэдэгдээгүй, мэдэгдэх ч шаардлагагүй гэж томорчээ. Тэр ч бүү хэл Монголын газар нутгийг худалдах ажиллагаагаа Улаанбаатарт хийх шаардлагагүй хэмээн онцолсон бөгөөд Канадад гэрээ байгуулна гэж тавласан өнгөөр илэрхийлсэн юм. Монголын хуулиар Монголчууд та нараас зөвшөөрөл авах шаардлагагүй, зөвлөлдөх ч үгүй гэж “Чалко” компанийн өмнөөс “Саусгоби Ресурсиз” мэдэгдээд байгаа.

      Монголын гурван сумын хэмжээний газар нутгийг худалдан авах энэхүү ажиллагааг “Саусгоби Ресурсиз”-ийн толгой компани болох “Айвэнхоу Майнз” Хятадын “Чалко” компанийн хооронд хийгдэж эхэлсэн бөгөөд удахгүй эцэслэн гарын үсэг зурах юм. Гэрээг эцэслэн зурахаас өмнө эсэргүүцэж эхэлсэн монголчуудын тоо нэмэгдэж байна. УИХ-ын гишүүд ч энэ асуудлыг хуулиар зохицуулахаар эрчимтэй ажиллах болов. Монголын Засгийн газар ч гэсэн хятадуудад эсэргүүцлээ илэрхийлэхээр бэлдэж эхэлжээ. Магадгүй Н.Энхбаярын баривчилгаатай зэрэгцээд  “Саусгоби Ресурсиз”-ийн хорон бодлогыг эсэргүүцсэн жагсаал цуглаан болж мэдэхээр байна. Ийнхүү монголчуудын нэгдэн нийлж байгаа процессыг хөндлөнгөөс ажиглаж байгаа “Саусгоби Ресурсиз” хувьцаа шилжүүлэх үйл ажиллагаанд хөндлөнгөөс нөлөөлөх боломжгүй, хууль зөрчөөгүй гэж мэдэгдээд байгаа. “Саусгоби Ресурсиз” энэ том мэдэгдэлд монголчууд бүгдээрээ нэгдэн нийлж хариу өгөх цаг ирлээ. Монголчуудын нэгдмэл байр суурийн өмнө “Саусгоби Ресурсиз” дахин ийм том мэдэгдлээ хийх эсэхийг харах ёстой гэж иргэний хөдөлгөөнүүд үйл ажиллагаандаа бэлдэж эхэлжээ.

     Уг гэрээний асуудлыг “Саусгоби Ресурсиз”-ийн ТУЗ-ийн хараат бус гишүүд хэлэлцэн үр дагаварыг нь судлах тусгай хороо байгуулан ажиллаж байгаа ч гэсэн эцсийн дүгнэлтээ гаргаагүй аж. Энэхүү тусгай хороо монголчуудын байр суурийг харгалзан үзэж Монголын газар нутгийг зарах ажиллагаагаа зогсоох талаар тодорхой арга хэмжээ авахгүй бол багагүй хохиролтой нүүр тулж мэдэхээр байна. “Саусгоби Ресурсиз”-ийнхэн хувьцаагаа зарж манай улсын төсөвт ихээхэн хэмжээний орлого оруулж, шинэ ажлын байрууд гаргаж, эдийн засгийн өсөлтийг дэмжинэ гэж мэдэгдэж байгаа нь том доромжлол юм. Энэ компаний үлгэрийн мэдэгдэлд итгэх монгол хүн олдохгүй байна.
   “Саусгоби Ресурсиз” компанийн талаарх дэлгэрэнгүй мэдээлэл, лицензийн тоо, байршил, удирдлагын талаарх мэдээллийг манай сайт үргэлжлүүлэн хүргэх болно. Учир нь гадаадын хөрөнгө оруулалтыг эх орондоо оруулахыг монголчууд бид дэмжих боловч гадаадын төр Монголын газар нутагт хяналтаа тогтоох гэж байгааг дэмжих учиргүй билээ.