Өчигдөр орой МАХН-ын дарга, ерөнхийлөгч асан Н.Энхбаяртай хамт Төв аймаг дахь урьдчилан суутуулах төвд байсан бие хамгаалагчийг нь гаргасан. Энэ талаар Н.Энхбаярын гэргий О.Цолмонтой хийсэн ярилцлагыг хүргэж байна.

    Өчигдөр орой МАХН-ын дарга, ерөнхийлөгч асан Н.Энхбаяртай хамт Төв аймаг дахь урьдчилан суутуулах төвд байсан бие хамгаалагчийг нь гаргасан. Энэ талаар Н.Энхбаярын гэргий О.Цолмонтой хийсэн ярилцлагыг хүргэж байна.

- Өнөөдөр МАХН-ын дарга Н.Энхбаяртай цуг байсан хамгаалагчийг нь гаргачихлаа. Та энэ талаар хэзээ мэдсэн бэ? Юу гэж бодсон бэ?
- Би мэдсэн л дээ. Манай хүн бол хоёр давхрын камерт байдаг юм байна. Харин бие хамгаалагчийг нь нэг давхарт тусгай өрөөнд тусад нь байлгадаг байсан. Гэхдээ манай хүн камертаа ямар байна, хэн орж, гарч байна вэ гэдгийг хамгаалагч  нь камер дотроосоо харж байх боломжтой байсан юм.  Би яахав, үе үе утасдаад манай хүн яаж байна, бие нь ямар харагдаж байна гэж асуудаг. Харин сая дөрвөн цагийн үед утасдаад за одоо яаж байна, Н.Энхбаярын бие нь ямар байна, царай зүс нь ямар байна гэхэд манай хамгаалагч “Би одоо даргын талаар ямар ч мэдээлэл өгөх боломжгүй болсон. Намайг гаргасан. Та нар энэ байранд байх ямар ч шаардлагагүй гээд намайг гаргачихсан. Бид нар даргын тухай ямар ч мэдээлэл өгч чадахгүй ээ” гэж хэлсэн.
   Тэгээд би сандарсан л даа. Яагаад гэвэл өнгөрсөн 12-оос 13-ны шөнө манай хүнтэй үнэхээр эвгүй харьцаж байсан. Сүүлд намайг харахад бараг муужруулаад аваад явсан нь харагдсан. Ингэж түмний нүдэн дээр гэрчтэй, телевизийн камертай, УИХ-ын гишүүн байхад ингэж балмад аашилсан юм чинь  ганцааранг нь үлдээчихээд яаж байгаа бол гэдэгт би маш их санаа зовж байна. Шуудхан хэлэхэд амь насанд нь халдахад үгүйсгэх арга байхгүй гэж бодож байна. Чухам яагаад бүтэн сайн өдөр ингэж хамгаалагчийг нь гаргаж байгаа нь асуудал. Бид хэд хөөцөлдөөд аймгийн прокурорт өргөдөл өгч болно. Гэхдээ өгөдлийг ажлын өдөр өгдөг, өнөөдөр хуулийн процетураар явах боломжгүй гэсэн. Чухам бүтэн сайн өдөр, энд тэнд өргөдөл гаргах боломжгүй үед ингэж байгаа нь юу гэсэн үг вэ гэвэл нэг л хариул гарч байна л даа. Манай хүний амь нас ямар ч баталгаагүй болчихсон байна.

- Хамгаалагч нь гарч ирээд Н.Энхбаяр даргын бие ямар байгаа талаар хэлсэн үү?
- Тэгэж балмадаар аваад гарахад дотуур гэмтэл, тархины гэмтэл авсныг үгүйсгэхгүй. Үнэхээр тэд маш их аймшигтай харьцсан. Манай хүн биеийн тамираар хичээллэдэг спортын хүн болохоор бие сайтай, тэвчээртэй. Нэлээд сайн тэвчээртэй. Барагтай юм дээр ингээд байна, тэгээд байна гэж хэлэхгүй. Ер нь царай нь маш их цонхигор байсан гэж хүмүүс хэлж байсан.

- Та нар маргааш өглөө хуулийн байгууллага хандах уу?
- Маргааш өглөө хандаад, нөгөөдүүл нь аваад хариу өгтөл, маргааш хүртэл юу тохиолдох бол гэдгийг би мэдэхгүй байна. Сая хамгаалалт буухад манай хүний бие ямар байсан, маргааш тийм байдалтай байна гэхэд би эргэлзэж байна.

- МАХН-ын гурван хүнд зарлан дуудах хуудас ирсэн байна л даа. Энэ бүхнээс хараад байхад улс төрийн зорилготой баривчилгаа улам бүр лавширч байгаа юм шиг санагдаж байна. Та үүнд ямар бодолтой байна вэ?
- Зөвхөн энэ гурван хүн биш л дээ. Манай хүний 2009 оноос хойш хийсэн ажил, бүх зүйлээ эмхэтгээд ном гаргасан юм. Тэр ном нь намын байранд ирсэн гэхээр нь би номыг авах гээд явсан юм. Тэнд очоод сонсоход хэчнээн олон залуучуудыг дайрсан, заналхийлсэн, барьсан, баривчилсан, байна вэ? Зарлан дуудах өгнө гэдэг юу ч биш. Энд хэлмэгдүүлэлт явж байна. Олон хүний гар утас руу нь залгаж ална гэж заналхийлж байгаа. Би сая найз руугаа яриад утсаа тавьсан чинь эргээд манай найз руу утасдаад “хохино шүү, ална шүү” гэж сүрдүүлсэн байгаа юм. Тийм зүйл маш их сонсогдож байна.

- Ярилцсанд баярлалаа.