МАХН-ын дарга, ерөнхийлөгч асан Н.Энхбаярын бичсэн номын нээлт өнөөдөр “Зууны мэдээ” сонины мэдээллийн төвд болно. “Ард түмний дэмжлэг албан тушаалаас хүчтэй” нэртэй энэ номд Н.Энхбаяр 2009 оноос хойш өөрийн хийсэн ажил, бичсэн зүйлээ эмхэтгэн оруулсан байна. Номын нээлтэнд зохиогч нь өөрөө оролцох боломжгүй болсон ч МАХН-ын гишүүд болон эхнэр О.Цолмон нь зохион байгуулж, оролцох юм байна.

   Н.Энхбаяр бол ном бичдэг цөөхөн улс төрчдийн нэг бөгөөд бичсэн номноосоо болж авлигын хэрэгт шалгагдаж байгаа билээ. Түүний гаргасан “Найман шарга” нэртэй хавтуу хавтастай, цэнхэр өнгөтэй номыг хэний, ямар санхүүжилтээр хэвлэсэн тухайд хэрэг үүсгэсэн юм. Тухайн үед “Найман шарга” нь Монголын хамгийн үнэтэй номоор нэрлэгдэхийн хажуугаар төрийн байгууллагын ажилчдад хүчээр зарж байна гэсэн шүүмжлэл дагуулж байсан юм. Энэ номыг нийтлэлч Б.Баабар “Монголын түүхэнд хамгийн их борлуулалттай, “галзуу ашиг” олсон ном” гэж тодорхойлж байжээ.