Цагдаагийнхан өнгөрсөн оны сүүлчээр мөрийтэй тоглоомын газар хууль бусаар ажиллуулж, тэндээ бооцоо тавин тоглож байсан олны танил эрхмүүдийг илрүүлэн шалгаж эхэлсэн. Прокурорын байгууллагаас уг хэрэгт саяхан яллах дүгнэлт үйлдэж шүүхэд шилжүүлээд байсан юм. Боксчин Д.Лхавга, Ё.Батцэнгэл, Б.Батдэлгэр, Ц.Батсүрэн, Т.Жавхлантөгс, Б.Дашдондог, Б.Булган, Ж.Нямгэрэл, Я.Угтахбаяр, Б.Мөнгөнхөлөг, н.Батцэрэн, Я.Энхбаяр, Б.Цэен, Ө.Мөрөн нарын 14 хүнд холбогдох эрүүгийн хэргийг өнөөдөр Хан-Уул дүүргийн шүүхэд хэлэлцэх гэж байна. Тэдэнд эрүүгийн хуулийн 243.1, 243.2, зүйл анги буюу мөрийтэй тоглоом зохион байгуулсан, давтан тоглосон гэсэн үндэслэлээр яллах дүгнэлт үйлдсэн байна. Албаны эх сурвалж, “Эрүүгийн хуулийн 243.1-д заасан гэмт хэргийг үйлдсэн бол хөдөлмөрийн хөлсний доод хэмжээг 5-50 дахин нэмэгдүүлж торгох, эсвэл 1-3 сар баривчлах ялтай. Харин эрүүгийн хуулийн 243.2-т заасан гэмт хэргийг үйлдвэл эд хөрөнгийг нь хурааж, хөдөлмөрийн хөлсний доод хэмжээг 51-250 дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсвэл хоёр жил хүртэл хугацаагаар хорих ялаар шийтгэдэг” гэлээ. Хэрэгт холбогдсон хүмүүсийн дунд Пан Азийн аварга Д.Лхавга, “Ландага” хочит Ё.Батцэнгэл нарын олны танил хүмүүсийн нэрс байгаа нь сонирхол татаж буй юм. Шүүх хуралд Б.Тэнгис, Р.Цэрэнханд нарын долоон өмгөөлөгч оролцохоор болжээ.  Харин улсын яллагчаар М.Бадам, шүүгчээр Хан-Уул дүүргийн шүүхийн ерөнхий шүүгч Ё.Цогтзандан ажиллах юм байна.