Хууль зүй, дотоод хэргийн сайд Ц.Нямдоржийг огцруулах хүсэлт гаргаж МАН-ын зарим гишүүд УИХ-ын даргад өргөдөл өгөөд байгаа. АН-ын гишүүд ч үүнийг нь дэмжиж байгаа юм. Ц.Нямдорж сайдтай холбоотой асуудал сөхөгдөх болгонд тэрбээр хүсэлт гаргасан хүмүүсийг хууль зөрчсөн гэсэн баримтуудыг гаргаж ирдэг байсан. Тэгвэл энэ удаад түүний эсрэг маш олон гишүүн санал өгөхөөр болсон тул хүнд байдалд ороод байна. МАН-ын гишүүн Ч.Улаан "Энэ удаад гаднаас биш нам дотроосоо хариуцлага тооцож байгаа болохоор үр дүн гарах байх" гэж мэдэгдсэн. МАХН-ын дарга Н.Энхбаярыг баривчилж, цагдаа, хүчний байгууллага болон зарим иргэдийн дунд зөрчил үүсээд байхад тэрбээр “Ийм зүйл болсныг өглөө нь мэдсэн” гэсэн хариулт өгч байсан.  Нэр бүхий гишүүд огцруулах хүсэлтээ УИХ-ын даргад өгөх үеэр тэрбээр Төрийн ордонд С.Баяртай өрөө рүү нь тун баргар царайтай  орж харагдсан юм. Одоогоор энэ талаар Ц.Нямдорж сайд ямар нэгэн мэдэгдэл хийгээгүй байна. Учир нь МАН-ын удирдах зөвлөлийн шийдвэрийг харж байж дараагийн нүүдлээ хийх гэж байгаа тухай эх сурвалжууд хэлж байна.