Ой, хээрийн түймрийг тэтгэх гол материал нь унаж үжирсэн мод, бут, сөөг, хөвд, өвслөг ургамлууд байдаг бөгөөд түймрийн шалтгааны 90% нь хүний үйл ажиллагаатай холбоотой, харин үлдсэн хувь нь байгалийн гэнэтийн хүчин зүйлсээс буюу аянга, цахилгаан, биохимийн урвал, хүчтэй салхины улмаас мод, ургамалд үрэлт үүссэнээс болдог гэнэ. Иргэд нийслэлийн ногоон бүсэд олноороо зорчин, аялж зугаалдагтай холбогдуулан ой, хээрийн түймрээс урьдчилан сэргийлэхийг Нийслэлийн Онцгой байдлын газраас онцгой анхааруулж дараах сэрэмжлүүлгийг хүргэж байна. Үүнд:
- Нийслэлийн ногоон бүсэд зорчиж байгаа иргэд ил задгай гал гаргахгүй байх,
- Татсан тамхины ишээ бүрэн унтрааж, гал түлсэн тохиолдолд үнс, нурам, цогоо гүйцэт унтрааж аюулгүй болгох,
- Явуулын зуух хэрэглэж байгаа бол яндангийн цонолтоос оч алдах, гал гарахаас урьдчилан сэргийлж анхаарал болгоомжтой байх,
- Янз бүрийн галт сум, дохионы пуужин хэрэглэхгүй байх,
- Ногоон бүсэд автомашин, техник хэрэгслээр зорчиж буй жолооч нар машин, тракторынхоо янданд оч баригч заавал хийх,
- Бага насны хүүхдийг галаар тоглуулахгүй байх,
- Техникийн хавиралт, үрэлт үүсэхээс сэргийлэх,
- Гал түймэр унтраах анхан шатны багаж хэрэгсэлтэй байх,
- Хашаа хороо, ойр орчимдоо хамгаалалтын зурвас татаж гал түймрийн аюулаас урьдчилан сэргийлэх, хэрэв гал түймэр гарсан даруйд яаралтай 101 дугаарын утсанд залгахыг анхааруулж байна.
Б.Чимэг
