УИХ-ын гишүүн Д.Тэрбишдагва, Ч.Улаан, Ц.Шинэбаяр, О.Чулуунбат нарын  биед хүчний байгууллагын албан хаагчид халдсан. Тиймээс эдгээр гишүүд УИХ-ын даргад гомдол мэдүүлсэн юм. Энэ асуудлыг Хууль зүйн байнгын хорооноос ажлын хэсэг байгуулж шалгана гэж байсан ч тус хорооны гишүүдийн олонхи нь шаардлагагүй гэж үзлээ. Учир нь Төрийн байгуулалтын байнгын хороонд Халдашгүй байдлын дэд хороо байдаг. Тиймээс Төрийн байгуулалтын байнгын хорооноос ажлын хэсэг гаргаж шалгуулах хэрэгтэй гэж олонхи нь үзлээ. УИХ-ын гишүүн Ж.Сүхбаатар “Сая байнгын хороо дээр гишүүд тал талаас ярилаа. Ер нь УИХ-ын гишүүний халдашгүй байдлын хүрээ хязгаар, ямар орчин нөхцөлд, ямар байдалтай байх юм гэдэг асуудлыг тодорхой болгох хэрэг гарч байна. Одоо мөрдөгдөж байгаа хуулинд ерөнхийлж оруулсан зүйл ч байгаа байх” гэсэн юм. Дөрвөн гишүүний гаргасан хүсэлтийг Төрийн байгуулалтын байнгын хорооноос ажлын хэсэг гаргаж шалгуулах эрх нь нээлттэй байгаа юм. Харин ямар тохиодолд УИХ-ын гишүүн бүрэн эрхээ эдлэх вэ?, Ямар тохиолдолд халдах эрх үүсэх вэ? гэдэг тун ярвигтай маргаан дагуулах бололтой байна.