ХЗДХ-ийн дөрвөн удаагийн сайд Ц.Нямдоржийг огцруулах асуудал энэ удаа эвгүйгээр эргэж мэдэхээр боллоо. Тэрбээр ХЗДХ-ийн сайдаар гурван удаа, дэд сайдаар нэг удаа томилогдож байсан, өөрийнх нь хэлдэгээр энэ салбарын “толгой” хуульчдын нэг.  МУИС-ийн хуулийн сургуулийг “ТМС” гэж хэлдэг хүний хувьд бол үнэхээр том амжилт л даа.

   ХЗДХ-ийн дөрвөн удаагийн сайд Ц.Нямдоржийг огцруулах асуудал энэ удаа эвгүйгээр эргэж мэдэхээр боллоо. Тэрбээр ХЗДХ-ийн сайдаар гурван удаа, дэд сайдаар нэг удаа томилогдож байсан, өөрийнх нь хэлдэгээр энэ салбарын “толгой” хуульчдын нэг.  МУИС-ийн хуулийн сургуулийг “ТМС” гэж хэлдэг хүний хувьд бол үнэхээр том амжилт л даа. Түүнийг ХЗДХ-ийн сайдаар дөрвөн ажиллах хугацаанд нь магадгүй түүнээс ч олон удаа огцруулах асуудлыг зарим хүмүүс тавьж байсан. Тухайлбал, УИХ-ын гишүүн Л.Гүндалай, Х.Баттулга, ерөнхийлөгч асан Н.Энхбаяр нар ийм асуудлыг сөхөж байв. Тэр бүхэнд тэсээд л үлдсэн. Харин энэ удаа түүнийг улс төрд олон жил хамтран зүтгэсэн намын нөхөд болох Ч.Улаан, Д.Тэрбишдагва, О.Чулуунбат, Р.Раш, Б.Балдан-Очир, Ц.Даваасүрэн, Ц.Шинэбаяр, Д.Загджав, Ц.Батбаяр нар огцруулахаар гарын үсэг зурлаа. Ц.Нямдорж ийм нүүдэл ирнэ гэж тооцоолох нь байтугай зүүдлээ ч үгүй байсан байх. Тиймээс өчигдөр өдөржин баргар царайтай явсан. Н.Энхбаярыг хоригдсон өглөө хэвлэлийнхэнд “ийм үйл явдал болсныг мэдээгүй” гэж инээмсэглэл тодруулан хэлсэн нь багагүй шүүмжлэл дагууллаа. Түүний харъяалалд байдаг 300 цагдаа төрийн тэргүүн байсан хүнээ баривчлах ажилд оролцсоныг сайд нь мэдээгүй бол энэ улс дампуурч байгаагийн шинж гэж олон хүн үзэж байгаа юм. Тэр мэдэхгүй байна ч гэж байхгүй. Зүгээр л хэвлэлийнхэнд мэдэхгүй гэж хэлсэн байх гэж ярьцгааж байна.

    Ц.Нямдоржийн олон удаагийн болчимгүй үйлдлээс болоод МАН-ын намын өмнө одоо орших уу? эс орших уу? гэдэг асуудал тулгарлаа. Мэдээж оршихгүй байхыг ямар ч улс төрийн хүчин хүсэхгүй. Харин оршихын тулд ямар нэгэн золиос хэрэгтэй. МАН-ын энэ удаагийн золиос нь ХЗДХ-ийн сайд Ц.Нямдорж болох гэж байх шиг. Ц.Нямдоржийг хамгаалвал энэ намын нэр хүнд улам унах нөхцөл бүрдээд байна. Тэгээд ч хамгаалах ямар ч шалтгаан алга. Тиймээс л Ц.Нямдоржоор туг тахиж байж тэсч үлдэх нь зөв гарц байж мэдэх юм. Ц.Нямдоржийг огцруулна гэж АН-ын бүлэг өчигдөр нэгдсэн шийдвэр гаргасан. АН-ын дарга, Ц.Нямдоржийн алтан нутаг Н.Алтанхуяг түүний дараагийн сайдтай асуудал ярихыг хүсч байгаагаа илэрхийлсэн. АН-ын бүлгийн гишүүд дээр МАН-ын гарын үсэг зурсан найман гишүүн, С.Оюун, Д.Энхбат, Ц.Шинэбаяр болоод бусад хүмүүсийг нэмэхэд Ц.Нямдоржид тэсч үлдэх боломжгүй дүр зураг харагдана. Энэ мэтээс харахад Ц.Нямдорж “мөнхийн” мэт зууралддаг ХЗДХ-ийн сайдын суудлаасаа огцрох нь тодорхой боллоо. Тэрбээр өмнө хууль зассан гэдэг үндэслэлээр УИХ-ын даргын өндөр сэнтий дээрээс унаж байсан туршлагатай. Туршлагаа л баяжуулах нь шиг байна.

   Сонирхолтой нь Ц.Нямдоржийг огцруулах дээрх төлөвлөгөөг МоАХ-ныхан бичсэн гэж эх сурвалж мэдээлэв. Учир нь Ц.Нямдоржийг огцруулах энэ удаагийн сценарийг түүний “мөнхийн” өрсөлдөгч УИХ-ын гишүүн Х.Баттулга бичээд намынх нь нөхдөөр нь өгүүлчихсэн гэв. Учир нь түүнийг огцруулах асуудлаар бүтэн сайны шөнө МоАХ-ны байранд албаны болоод иргэний нийгмийнхэн ярилцжээ. Уг цугларалтад УИХ-ын гишүүн Х.Баттулга, Ц.Шинэбаяр болоод МАН-ын нэр бүхий өөр ч гишүүд байжээ. Мөн иргэний нийгмийн О.Магнай ч байлцсан сурагтай. Тэд олон зүйлийг ярилцаад Н.Энхбаярыг өмөөрсөн гишүүдийг турхиран Ц.Нямдоржийг огцруулах асуудлыг өргөн барих, АН-ын бүлэг бүрэн бүрэлдэхүүнээр дэмжих зэрэг асуудал дээр санал нэгджээ. Энэ төлөвлөгөөний дагуу үйл явдал өчигдөр өрнөлөө. Мэдээж нарийн боловсруулсан төлөвлөгөө биелэнэ.

   Ц.Нямдорж “мөнхийн” дайсан гэж нэрлэгддэг Н.Энхбаярыгаа чадах гэж өөрөө “чадуулах” хэмжээнд хүрлээ. Мөн үл тоож, басч байдаг Х.Баттулга гишүүний төлөвлөгөөний дагуу албан тушаалаасаа нисэлт хийх гэж буй нь улс төрч хүний хувьд байж боломжгүй алдаа юм даа. Түүний ирээдүй манан мэт бүрхэг болоод байна.