Ерөнхийлөгч асан, МАХН-ын дарга Н.Энхбаяр Төв аймгийн урьдчилан хорих төвд очоод даруй дөрөв хонож байна. Түүнийг сулла гэж МАХН-ын гишүүд, дэмжигчид жагсаал хийж байгаа ч төдийлөн үр дүнд хүрэхгүй байгаа. Гэсэн ч тэрбээр хоригдож байх зууртаа сэтгэл санаагаар унахгүй, харин ч тэнд хоригдож байгаа сэжигтнүүдтэй нэлээд ойр дотно байгаа аж. Н.Энхбаярт гаднаас гутал, хувцас оруулж болохгүй байгаа тул хамт байгаа хүмүүс нь байгаа зүйлээрээ тусалж байгаа юм. Үүний хариуд Н.Энхбаяр Төв аймгийн урьдчилан хорих төвд байгаа 200 гаруй хүнд Бурхан багшийн сургааль айлдаж байгаа гэж тэнд хоригдож байгаа сэжигтнүүдийн ар гэрийнхэн хэлж байна. Н.Энхбаяр өөрөө их сүсэг бишрэлтэйн дээр анх Бурхан багшийн сургаалийг монгол хэлнээ орчуулан ном гаргаж байсан хүн. Дээр нь Бурхан шашны сургаалийг сурталчилдаг “TV9” телевизийг байгуулсан. Бурхны шашны зан үйлтэй холбоотой бүх л үйл ажиллагаанд идэвхитэй оролцдог нэгэн. Тиймээс ч “би хэлмэгдсэн, ядарч зүдэрч байна” гэхээсээ тайван байхыг илүүд үзэж байгаа тухай хүмүүс ярьж байна.

   МАХН-ын зарим гишүүд ч үүнийг сонсоод гаднаас ирэх шахалт, дарамтыг тэсээд үлдэнэ шүү гэж зориг орж байгаа бололтой.  А.Гитлер шоронд хоригдож байхдаа “Миний тэмцэл” номоо бичиж Германы удирдагч болох гараагаа эхэлж байсан. Харин В.Ленин “Юунаас эхлэх вэ?” гэдэг алдарт номоо мөн л шоронд хоригдож байхдаа эхлүүлсэн байдаг юм. Үүгээр жишээ авч МАХН-ын гишүүд түүнийг дараа, дараагийн үйл хэрэгтээ бэлдэж, бясалгаж байгаа гэж бага ч гэсэн сэтгэл өөдрөг байгаа гэв.

   Н.Энхбаяр яаж баригдсан, ямар арга хэрэглэсэн, хорьж байгаагийн цаана хэн байгаа тухай ярихаас илүү Бурхан багшийн сургааль, амар амгалангийн тухай хамт байгаа сэжигтнүүдэд айлдаж байгаа аж. Тухайлбал, “Зовлон үнэн, зовлонгийн шалтгаан үнэн, зовлонгоос ангижрах нь үнэн” гэсэн сургаалийн гүн утгыг тайлбарлаж өгч байгаа гэв.