24tsag.mn дуулиант баривчилгааны хөгжилтэй агшнуудын түүврээ үргэлжлүүллээ.

9. АТГ-ын ажилтнууд америк кинон дээр гардаг шиг Н.Энхбаярын машиныг хааж зогсоод баривчлахыг завджээ. Энэ комеди тавилттай боевик кинонд оролцогчдын тоо АТГ-ын талд ашигтай буюу илүү байв. Бужигнааны үеэр экс тэргүүн хатагтай эр нөхрөө өмөөрөн гарч ирээд АТГ-ын комиссарыг дарж унагахыг харсан гэрчүүд байна. Тавь гарсан эмэгтэйд хүч хүрэлгүй даруулж унасан хорин хэдтэй мөрдөгч залуу хижээл насны гэр бүлийн хоёрыг жолооч хамгаалагч хоёртой нь дийлж чадаагүй мөрдөгчид тооны хувьд  хоёр дахин илүү. “Манай хүн биеийн тамираар хичээллэдэг болохоор” гэсэн тайлбар Н.Энхбаярын ойрын хүрээллээс цөөнгүй гарсан юм. Энэ үгийг түүний эхнэрт ч хамаатуулж болохор байгааг О.Цолмонгийн  бие бялдрын бэлтгэл нотлон харуулав.  Харин авилгын “тул” барихаар бэлтгэгдсэн АТГ-ын тусгай ажилтнууд жараахайн дайны чадалтай байна.

10. Н.Энхбаяр ачигдаад явахаасаа хэдхэн минутын өмнө өөрийнхөө телевизэд ярилцлага өгөхдөө Элбэгдорж, Нямдорж, Баяр, Дорлигжав, Батболд, Мөнх-Оргил нарын зургаан хүнийг нэр цохон баривчилгааг зохион байгуулж байгаа хэмээн мэдэгдсэн юм. Харин Н.Удвал авхай үүн дээр хожим 7 дахь нэрийг өөрөө нэмжээ. Баривчилгааны дараа МАХН-ын ерөнхий нарийн бичгийн дарга нүдний шилэн дээгүүрээ харан, хоолойгоо зангируулж мэдэгдэл хийхдээ даргынхаа нэр цохсон нэрс дээр Т.Бадамжунайг нэмэн долоон хожгор болгожээ. Н.Удвал ирэх сонгуулиар Архангай аймагт нэр дэвшихээр зэхэж байгаа бөгөөд тэнд мөн Т.Бадамжунай түүнтэй өрсөлдөх юм.

11. ТВ9-д ярилцлага өгч байхад Н.Энхбаярын гар утас дуугарав. Сурвалжлагч охины дарга нь ярилцлагынхаа завсарт утсаа харснаа “Бат-Эрдэнэ аварга байна. Дуудчих” гээд өөр нэгэнд дамжуулсан билээ. УИХ-ын гишүүн, аварга, баатар Б.Бат-Эрдэнэ үүрээр иргэн Н.Энхбаярт дуудагдсан боловч үүнээс хэдхэн минутын дараа дуудсан хүн нь “холбогдох боломжгүй” газар руу ачигдсан юм.

12. Соёлын гавьяат зүтгэлтэн, зохиолч Д.Төрбат баривчлагдсан улс төрчийг (хэн болохыг таана уу) өмгөөлсөн телевизийн (аль ТВ болохыг таана уу) ярилцлагад оролцохдоо “Дарга бол гэгээрсэн хүн шүү дээ” гэж мэдэгдэв. Харин БНН-ын дарга Б.Жаргалсайхан “Н.Энхбаяр даргыг ном татваргүй оруулсан гээд байна лээ. Номын хулгай бол хулгай биш гэдэг юм” хэмээн өмөөрчээ.

13. ТВ9-өөр манлайлуулсан зарим “сэтгүүлчдийн” хэвлэлийн бага хурал дээр тавьсан асуулт “Яахаараа та нар...”, “Тэгэж ярих юм бол...”, “Та нар өөрсдөө...” гэж эхлээд "... болохгүй шдээ”, “... арай дэндэж байгаа юм биш үү?”, “... тодорхой байна шдээ?” зэрэг үгсээр төгсөж байлаа. Мэдээлэл дамжуулагчид маань заримдаа Н.Удвалаас хол ялгаатай харагдаж чадахгүй байна.

14. УИХ-ын гишүүн Ч.Улааны мэдэгдлүүд хамгийн учир битүүлэг үгсээр дүүрэн байна. “Та намаасаа гарах уу?” гэсэн асуултад “Зүүний чиглэлийн намууд эвсэх нь зүйтэй” гэдэг бол “МАХН-ын бүлэг УИХ-д байгуулах гэж байгаа юм уу?” гэхээр “Уугуул намаа сэргээх талаар ажиллана” зэргээр хагас хариулт өгөөд байдаг болжээ.