Дэлхийн банкны ерөнхийлөгч өнөөдөр тодорлоо. Энэ албан тушаалын эзнээр 52 настай, Солонгос гаралтай Жим Ён Ким тодорчээ.

    Дэлхийн банкны ерөнхийлөгчийн албан тушаалийг горилогчид өнгөрсөн гуравдугаар сард нэрээ дэвшүүлсэн юм.

    Эдгээрт Өмнөд Солонгос гаралтай Жим Ён Ким, Нью Йорк дахь Колумбийн их сургуулийн профессор Хосе Антонио Окампо, Нигерийн сангийн сайд Нгози Оконжо-Ивеал нар байлаа.

   
    Жим Ён Кимийг АНУ-ын ерөнхийлөгч Барак Обама Дэлхийн банкны ерөнхийлөгчид нэр дэвшүүлсэн юм.
   
    Жим Ён Ким нь Солонгост төрсөн, эмч мэргэжилтэй бөгөөд таван настайдаа гэр бүлийн хамт АНУ-д сууршин амьдарсан байна.

    “Дартмут коллежийн еренхийлөгч, Дэлхийн эрүүл мэндийн байгууллагын ДОХ-той тэмцэх хэлтсийг тэргүүлж байсан тэрбээр Дэлхийн банкны ерөнхийлөгчөөр тодорсон нь олон хүнийг шокд орууллаа” хэмээн Гуардиан агентлаг бичжээ.

    Дэлхийн 187 гишүүн оронтой, 9000 гаруй ажилтантай, хөгжиж буй орнуудад жилдээ 60 тэрбум долларын хөрөнгө оруулалт хийдэг  энэ байгууллагын тэргүүнээр сонгогдсон Жим Ён Ким дэлхий дахины анхааралд байна.

Дэлхийн банк 1944 онд үндэслэн байгуулагдсанаас хойш дандаа америкийн иргэн л тэргүүлж ирсэн байна.