МАХН-ын дарга Н.Энхбаяр Төв аймгийн урьдчилан саатуулах төвд хоригдоод тав хонож байна. Түүнийг хоригдсоны дараа Хүний эрхийн хуульч М.Ичинноров тус ангийг хүнийг тамлан зовоодог газар, эрүүдэн шүүдэг, аавын хүүгийн шүүсийг шахдаг газар хэмээн мэдэгдсэн. Түүнийг урьдчилан саатуулах төвд ганцааранг байлгах нь амь насанд нь аюултай гэж гэр бүлийнхэн нь гомдол гаргасны дагуу бие хамгаалагч нь цуг хоригдохоор болсон билээ.
    Төв аймгийн Шүүхийн шийдвэр гүйцэтгэх албаны дарга, хурандаа Ц.Болд “Н.Энхбаяр нийтийн хоол идэхгүй байгаа. Манай төлбөрт үйлчилгээгээр хэн ч үйлчлүүлж болно. Энэ журмын дагуу хоол захиалах эрхтэй. Н.Энхбаярын нэрийн дансанд мөнгө орж ирсэн. Тэр өөрөө хоолоо захиалж байгаа. Хоолны аюулгүй байдалд хоёр хоног тутамд мэргэжлийн хяналтын газраас хяналт тавьдаг. Мөн манай цагдан хорих төв нарийн мэргэжлийн эмчтэй. Сэжигтнийг авчрангуут нь эмчийн үзлэгт оруулсан. Ямар нэг өвчин илрээгүй. Түүний бие сайн байгаа. Уг хүн нь өөрөө их бие сайтай юм билээ. Эрүүл мэнд нь анх ирсэн шигээ сайн байгаа. Сэтгэл санааны хувьд тайван байгаа” гэжээ.

Б.Чимэг