“Монголын түүхэнд тодорсон дөрвөн Ерөнхийлөгчийн Гуравдахь нь шоронд сууж байна. Яагаад?” гэж эхэлсэн захидалдаа МАХН-ын дарга, ерөнхийлөгч асан Н.Энхбаяр хэд хэдэн хүний нэрийг цохсон байна. Н.Энхбаярыг баривчилсан нь улс төрийн явуулга биш гэж зарим УИХ-ын гишүүд мэдэгдэж байгаа энэ үед тэрбээр “улс төржсөн баривчилгаа” болсон гэж дүгнэж буйгаа илэрхийлснийг түүний захидлаас уншиж болно.

   Захидалд бичсэнээр “600 өвч зэвсэглэсэн цагдаа дайчилж 20, 30-хан хөгшид, залуучууд, 10-аад сэтгүүлч, сурвалжлагч цугласан байр руу тэгэж дайн дажин болж байгаа юм шиг сүр үзүүлэн дайрч, байшин барилга эвдэж, эргэн тойрон байгаа хүмүүсийн амар амгаланг алдагдуулж дайрсан” хүмүүс нь Ц.Элбэгдорж, Д.Дорлигжав, Л.Хурц нар гэж бичсэн байна. 

   Ц.Элбэгдоржийг алхам тутамдаа хууль зөрчиж байгаа гэхийн хажуугаар хууль хяналтын байгууллагуудад өөрийн хань хамсаатнаа хууль бусаар томилж, улс төрийн даалгавар өгч ажиллаж байгаа гэсэн байна. "Шүүх прокурор, АТГ, цагдаа бүхэлдээ эрх баригчдын гарын утсан хүүхэлдэй болж, улс төрийн хэлмэгдүүлэлтийн машин болсныг нотоллоо" гээд өөрийг нь баривчилснаар өнөөгийн олигархийн дэглэм багаа бүрэн хууллаа гэж тэрбээр дүгнэсэн байна. Мөн "2008 оны 7-р сарын нэгэнд таван хүн амь үрэгдсэн хэрэгт луйвраар төрийн өндөр албан тушаалд очсон эрхмүүд 3 хурандаа, 1 генералыг золиосолж асуудлыг хаах гэж зүтгэж байна" гэж өөрийн байр сууриа илэрхийлжээ.