Нийслэлийн цагдаагийн газрын Хэв журмын хэлтсийн дарга асан, цагдаагийн хурандаа Г.Ганбаатарын өмгөөлөгч Т.Мөнхдэлгэрийг энэ сарын 13-нд баривчилсан. Долдугаар сарын 1-ний хэрэгт буруутгагдан хоригдож байгаа хурандаа нарын хэрэгт өмгөөллийн үйлчилгээ үзүүлж байсан дөрвөн өмгөөлөгч өнгөрсөн сарын 28-нд болсон шүүх хурлын үеэр үйлчлүүлэгчдээсээ татгалзсан нь ийнхүү хоригдоход хүргэсэн юм. О.Алтангэрэл, Т.Мөнхдэлгэр нарыг шүүх хурлын үеэр үйлчлүүлэгчээсээ татгалзаж, хуралдаан даргалагчийн зөвшөөрөлгүй танхимыг орхин гарсан. Мөн шүүх хуралдааныг санаатайгаар тасалдуулж, цааш үргэлжлүүлэх боломжгүй болгосон гэсэн үндэслэлээр Сүхбаатар дүүргийн ерөнхий шүүгч Т.Соёмбо-Эрдэнэ захирамж гарган, хорьсон. Эл шийдвэрийг түүний өмгөөлөгч Б.Амарсанаа эсэргүүцэж, давж заалдах шатанд гомдол гаргаад байсан юм. Түүний эл гомдлыг тус шүүх өчигдөр хэлэлцээд Т.Мөнхдэлгэрийг 14 хоногоор баривчлах шийдвэр нь үндэслэлтэй байна гэж үзэн, түүнийг үргэлжлүүлэн хорих шийдвэр гаргалаа.
Б.Чимэг
